Emra si Valentino Murataj, Herald Marku, Lorenc Trashi, Sodiq Atanda dhe Albi Alla, ishin “qershia mbi tortë” për Flamurtarin, por Sinan Idrizi e ka një peng nga merkato e kësaj vere që quhet Dejvi Bregu.

Kreu i klubit e kishte marrë me shumë dëshirë, rikthimin e vlonjatit. Gjatë një prononcimi për “Panorama Sport”, administratori Idrizi zbardh takimin më të fundit me Bregun. Sipas Idrizit, Dejvi tregoi shpirtin e vlonjatit, pak altruist për Vlorën. Megjithatë administratori e ka një fije shprese edhe pse e zbehur, që nëse talenti vlonjat nuk shkon jashtë, do të vijë te Flamurtari.

“Kam pasur javën e kaluar një takim me Bregun. E doja te Flamurtari, pasi e kemi djalin tonë. Por Dejvi po tregon shpirtin e vlonjatit, pak altruist për Vlorën. Ka pasur një ofertë shumë të mirë jashtë Shqipërisë. Është shumë e majme si ofertë. Menaxherët i kishte spanjoll. Ishte një grup i fortë. Nuk donte që ta bënte publike. Në të kundërt do të vijë në Vlorë, direkt më tha”, shprehet Idrizi.

MERKATO, THUAJSE E MBYLLUR – Sinan Idrizi mendon se i duhet dhënë fund afrimeve. I ka plotësuar çdo dëshirë trajnerit Andrea Agostineli dhe drejtorit Artim Pollozhani dhe tani ka ardhur momenti i mbylljes së merkatos. Sipas Idrizit ekipi është i plotë dhe me pozicione të dubluara. “Ekipi është i plotë. Kemi shumë ngarkesë tani. Nuk keni ku t’i çojmë më. Ndaj merkato do të mbyllet. Çfarë kanë kërkuar, u kemi plotësuar dëshirën. Afrime kanë qenë cilësore. Tani të punojnë për të arritur objektivin. Vlora nuk pret më”, shprehet administratori.

GODITJA E FUNDIT – Mesa duket ka vend edhe për një afrim të fundit. Administratori Sinan Idrizi nuk jep shumë detaje, por thotë se bëhet fjalë për një mbrojtës që do t’i bashkohet shumë shpejt skuadrës në Pogradec. “E kemi mbyllur edhe me një lojtar. Është një mbrojtës që do t’i bashkohet shumë shpejt skuadrës në fazën përgatitore”, zbulon administratori.

ERMAL SIKA – PANORAMASPORT.AL

NDIQE LIVE "PANORAMA TV"

---