Besa e Kavajës prej tri sezonesh ka zgjedhur si qendër stërvitore në kuadër të përgatitjeve të sezonit të ri qytetin e Ersekës.

Presidenti Nexhat Bizhdili që çdo ditë është pranë ekipit, ekskluzivisht për “Panorama Sport” thotë: “Jam i kënaqur me kushtet që të fal Erseka, me një klimë të freskët dhe me njerëz shumë mikpritës. Këtu ke kushte si në asnjë vend tjetër. Dhe sa të jem unë president i Besës, Erseka do të jetë qendra stërvitore e ekipit.

Dua të falënderoj kryetarin e bashkisë, Erjon Isai, por në veçanti sekretarin e klubit ‘Gramozi’, Ilir Qirjako, i cili na ka qëndruar afër duke na krijuar të gjitha kushtet. Këtu kemi gjetur terrene shumë të mira, ku përveç stadiumit ka dhe dy fusha sportive me bar natyral, që të lejojnë të kryesh stërvitje shumë normalisht. Nga kjo kanë mbetur të kënaqur stafi i Besës por dhe lojtarët”, shprehet në hyrje të intervistat presidenti i Besës së Kavajës.

Besa ka zhvilluar deri tani tri miqësore, sa i kënaqur jeni me paraqitjen e ekipit tuaj?
Mund të them që skuadra është shumë e ngarkuar nga ana fizike dhe dy ndeshjet e para nuk tregojnë vlerat e ekipit. Ndeshja me Skënderbeun, që përfundoi në barazim 1-1, për ne përkthehet si një fitore pas një lodhje të madhe në këtë fazë përgatitore. Ekipi tashmë është mësuar me ngarkesat dhe është më në formë. Mendoj se gradualisht të gjitha ndeshjet që do luajmë do i fitojmë, sepse nuk kemi më kohë për të humbur.

Po afron starti i kampionatit. Mendoni për ndonjë afrim tjetër në skuadër deri në fillim të kampionatit?
Kemi dy lojtarë që kemi në kontratë, por problemi i vizave ka bërë qe mos i bashkohen dot në kohë. Por, besoj qe brenda javës do të jenë me ekipin. Gjithashtu, dhe dy blerje të tjera “bombastike” dhe çdo njëri prej tyre kushton mbi 50 mijë euro.

Ku keni menduar t’i luajë Besa ndeshjet e shtëpisë këtë sezon?
Tashmë e kemi mbyllur çdo gjë. Të gjitha takimet këtë sezon do t’i luajmë në stadiumin e Rrogozhinës.

A keni planifikuar këtë javë ndonjë miqësore?
Po, ndeshja do të luhet në qytetin e Ersekës me Skënderbeun ose Tiranën.

KOÇO LILO – PANORAMASPORT.AL

NDIQE LIVE "PANORAMA TV"

---