Dilema për formacionin anti-Laçi, trajneri Shkëmbi mund të ulë në stol Haxhiun
Tirana është gati për sezonin e ri, ashtu siç janë edhe idetë e Bledi Shkëmbit për formacionin tip që do të aktivizojë në kampionat. Fakt është që tani gjërat janë kristalizuar dhe në skuadër ndihet hierarkia e titullarëve dhe atyre që do të luftojnë për minuta.
PORTA – Dyshime nuk ka. Gentian Selmani do të jetë portieri i parë. Në vend të dytë Kozi dhe Harizaj. Gjithsesi, Kozi me shumë mundësi do të ndryshojë ambient dhe Harizaj do të ketë vendin e gardianit të dytë.
MBROJTJA – Nga krahu i djathtë ku vjet kishte probleme Arhan ka hipotekuar fanellën e titullarit. Në qendër Dembele, Mici, Kola luajnë për dy fanella. Gjithsesi, francezi dhe Mici nisen favoritë në këtë lojë. Majtas Përgjoni nuk diskutohet që nga minuta e parë, duke venitur Ismailin që shpreson për të qenë në ekipin e parë, por kosovari do të jetë titullar, pasi kapiteni është i dëmtuar. Lista e kandidatëve në këtë repart është e gjatë.
MESFUSHA – Në këtë repart, Jonuzi është i salduar ashtu si spanjolli Soler. Për një fanellë do të luajnë Meta e Jaku. Marku është aty, ashtu si Tola e ndonjë tjetër.
SULMI – Reparti me më shumë konkurrencë. Haxhiu, Zharmuni, Prengaj Abah, Bajroviç, Ndreca, pa llogaritur afrime apo të rinjtë. Një 4-3-3 klasik, rrezikon që Haxhiu të jetë rezervë, me Abah të qenit titullar. Prengaj dhe Zharmuni me shumë mundësi do të jenë nga minuta e parë. Tirana mbylli ditën e premte serinë e ndeshjeve përgatitëse. Skuadra fitoi 1-2 kundër Burrelit në “Liri Ballabani”. Për bardheblutë kjo ishte ndeshja e dhjetë dhe e teta miqësore gjatë kësaj vere.
Skuadra ka tri fitore, tri humbje dhe katër barazime, me një golavarazh të përgjithshëm 10-10. Duhet pranuar se bardheblutë kanë probleme me golat. Kjo pasi, 5 sulmues ka larguar Tirana nga sezoni i shkuar. Ata janë Abazaj, Hasani, Latifi, Patrik, Kaina. Të gjithë bashkë kanë shënuar 36 gola gjithë kampionatin. Duhet kujtuar se 56 gola shënoi sezonin e shkuar ekipi i Tiranës. Bardheblutë u shpallën ekipi që ka shënuar më shumë kampionatin që lamë pas.
PANORAMASPORT.AL
