Çelsi dhe Atletiko e Madridit kanë hapur bisedimet për një marrëveshje që përfshin Zhoao Feliksin, pasi transferimi i Sami Omorodionit në “Stamford Bridge” është bllokuar në momentet e fundit dhe në mënyrë të papritur mbrëmjen e së dielës (vuan nga një dëmtim që e privoi edhe nga finalja e Olimpiadës).

Sulmuesi spanjoll pritej që të finalizonte lëvizjen e tij prej 34.5 milionë paundësh dhe të firmoste një kontratë shtatë vjeçare me opsionin për të rinovuar edhe për një vit, pasi u nis për në Londër. Por negociatat dështuan në momentin e fundit dhe megjithëse të dyja palët janë përpjekur të gjejnë një zgjidhje, lëvizja duket e pamundur tashmë. Atletiko dëshironte që ta shiste Omorodionin për të kompensuar marrëveshjet e tyre për blerjen e Konor Gallagerit nga Çelsi dhe Julian Alvarezit nga Mançester Siti.

Ato marrëveshje janë ende në fuqi, por Atletiko duhet të shesë më parë. Dhe tani ata kanë ringjallur bisedimet mbi Zhoao Feliksin, i cili më parë ishte i huazuar te Çelsi, por kishte qenë edhe objektiv i Aston Vilës. Sulmuesi portugez, i cili shënoi katër gola në 20 ndeshje për Çelsin, e kaloi sezonin e kaluar në huazim te Barcelona, ku ai shënoi dhjetë herë në 44 paraqitje. Sidoqoftë, situata e vështirë financiare e klubit katalanas bëri që ata të mos kishin mundësi të paraqiteshin me një ofertë të pranueshme për ta transferuar lojtarin përfundimisht.

Feliks u bë lojtari i katërt më i shtrenjtë në histori në korrik 2019, kur Benfika e shiti atë tek Atletiko e Madridit për 114 milionë paund. Portugezi është paraqitur me skuadrën e Diego Simeones në parasezon, por e ardhmja e tij mbetet e pasigurt. Siç u zbulua nga “Mail Sport” javën e kaluar, Atletiko ia ofroi Feliksin Sitit si pjesë e një marrëveshjeje për Julian Alvarezin. Dy klubet, arritën përfundimisht një marrëveshje fillestare prej 75 milionë eurosh për sulmuesin argjentinas.

ANDROKLI DRALO-PANORAMASPORT.AL

NDIQE LIVE "PANORAMA TV"

---