Laçi ka nevojë për përforcime sa më shpejt, sidomos në mbrojtje. E pohon trajneri Armando Cungu, i cili pas miqësores me Teutën në Durrës ka theksuar se përforcimi i mbrojtjes është emergjencë.

Trajneri shkodran që drejton kurbinasit ka pohuar gjithashtu se sezonin e ri do të shohim një Laç që luan futboll të bukur. Kurbinasit humbën 2-1 të mërkurën me Teutën, ku u vu re se organika që kishte në dispozicion trajneri Cungu ishte e reduktuar.

Profesor Cungu, sa i kënaqur jeni nga skuadra sa i takon ndeshjes miqësore me Teutën?
Mund të them se ishte një ndeshje përgjithësisht e mirë. Kemi pasur momente të mira në pjesën e parë dhe në fillim të pjesës së dytë. Skuadra shkoi mirë me këtë grup që ka dhe duke dituar ngarkesat që kemi pasur. Ajo që na mungoi, nëse mund ta them kështu, ishte finalizimi i aksioneve. Humbën raste si në pjesën e parë, edhe në të dytën. Kemi shumë punë për të bërë që të jemi në 100%- shin tonë, si në aspektin fizik, ashtu edhe atë taktik. Shpresojmë shumë që të kemi edhe afrime cilësore, që të jemi të gatshëm për sezonin që po vjen.

Duket sikur keni një problematikë në mbrojtje aktualisht dhe keni nevojë për afrime aty?
Kemi nevojë emergjente për t’u përforcuar në këtë repart dhe shpresojmë që ata që do të vijnë të jenë në nivelin që t’i përgjigjet sa më mirë ekipit dhe kampionatit.

Çfarë Laçi presim në sezonin që starton pas disa ditësh?
Unë pres një Laç të bukur, një ekip që luan futboll të bukur, kjo është e vërtetë. Duhet të harrojmë sezonin që lamë pas dhe të bëjmë një sezon tjetër, sepse mendoj se janë mundësitë për ta bërë këtë gjë.

ZAMIR QYPI – PANORAMASPORT.AL

NDIQE LIVE "PANORAMA TV"

---