Armando Broja ka qenë një mungesë e dukshme në stolin e Çelsit në ndeshjen ndaj Real Madrid që u luajt mbrëmë në SHBA, për t’i dhënë fund turit përtej Atlantikut të skuadrës londineze. Një vendim që ka çuditur shumëkënd duke llogaritur se ishte një miqësore pa kufizime lojtarësh që mund të mbaheshin në pankinë e provoheshin.

Fillimisht u mendua se mos Broja kishte pësuar dëmtim në stërvitjet e fundit me londinezët, por këtë e ka hedhur poshtë trajneri Enco Mareska, i cili pas ndeshjes ka folur me gazetarin e njohur britanik Ben Xhakobs, duke bërë të qartë se kishte qenë thjesht vendim i tij, mesazh i qartë që për shqiptarin karriera te Çelsi mund të cilësohet thuajse e mbyllur.

“Enco Mareska më thotë se Armando Broja nuk ishte lënë jashtë skuadrës së Çelsit që luajti ndaj Real Madrid për çështje dëmtimi”, shkruante Xhakobs në rrjetet sociale duke publikuar përgjigjen e trajnerit.  “Ishte thjesht një vendim. Për fatin tonë të mirë ai nuk është i dëmtuar”, janë fjalët e Mareska.

Gazetari më pas e kishte pyetur për të ardhmen e Brojës. “A do të largohet gjatë merkatos? Në këtë moment, të shohim se çfarë do të ndodhë…”, u përgjigj Mareska.

PANORAMASPORT.AL

NDIQE LIVE "PANORAMA TV"

---