Besa është zgjuar, teksa pas 4 humbjesh radhazi, 3 prej të cilave në këtë fazë, ka arritur të mundë Luzin. Kavajasit janë shndërruar në “macen e zezë” të luznjakëve, duke u marrë plot 9 pikë. Me këtë fitore Besa e parakalon Luzin me 1 pikë, duke u larguar nga 2 vendet që të nxjerrin direkt nga Kategoria e Parë.

Ishte një ndeshje ku ndryshe nga sa pritej, me dominim total të Besës. Luzi ishte larg ndeshjeve të fundit, ku mesfusha dhe sulmi nuk dhanë atë që pritej.

NDESHJA – Besa zbret në fushë me 3 mungesa, ndërsa Luzi me formacionin më të mirë. Luzi e nis mirë dhe që në minutën e 5-të gjen golin me Mandelën, por anësori e anulon. Topi u kthye nga një mbrojtës i Besës me kokë dhe Luzi proteston. Besa bën një kundërsulm model. Hoala niset nga mesfusha, pason te Ba dhe ky i fundit te Dabo, që përballë Matit godet fort dhe shënon.

Treni mundohet të përfitojë nga një gabim i portierit Ahmetaj, që zhytet dhe e rimerr topin. Hoala, në hyrje të zonës, godet bukur dhe Besa gjen golin e dytë në minutën e 29-të. Kavajasit dominojnë në lojë e raste, kurse Luzi nuk ka grintë dhe shpejtësi në veprime si në ndeshjet e tjera. Dabo dhe Mustafa Ba “zihen” kush të shënojë i vetëm përballë Matit, që ndërhyn saktë. Në fillim të pjesës së dytë ka vend për humor, teksa 4 lojtarë të Besës në kundërsulm dalin përballë një mbrojtësi, por Dabo nuk pason dhe humbet rastin.

Ba, i vetëm me portën bosh, nuk çon dot topin në rrjetë. Luzi provon me Trenin dhe Gjinajn, por pa rezultat. Në minutën e 72-të, Mustafa Ba gjuan me kokë vetëm 2 metra larg portës, por mbi tra. Pas 10 minutash ai realizon edhe golin e 3-të, ndërsa Luzi shkurton diferencën me një gol fantastik me kokë të Mandelës. Besa gjen edhe golin e 4-t me Shurdhiqin në fund dhe kështu mbyllet kjo sfidë me fitoren e thellë të kavajasve.

Trajneri Bubeqi: Ishte ndeshja që prisja

“Nuk kishim zgjidhje tjetër, veçse të reagonim. Nuk më kënaqin 4 golat, por mbi të gjitha loja që ekipi prodhoi. Dominuam me raste të shumta. Ishte ndeshja që prisja që kur kam marrë drejtimin e ekipit. Pashë dëshirë, sakrificë, altruizëm dhe grintë. Ky grup, përtej mungesave, ka gjithë forcën e kualitetin të shfaqet si sot. Ishte vetëm një fitore, i kemi të gjitha si finale deri në javën e fundit”.

Trajneri i Luzit, Gëzim Bushi:

“Na vjen keq që nuk luajtëm ashtu si këto javët e fundit. Ekipi e nisi mjaft mirë ndeshjen, duke shënuar. Nuk di çfarë emri i vendosi anësori golit të anuluar, kur topi u pasua prapa nga mbrojtësi i Besës. Kavajasit na kapën në befasi me një kundërsulm, goli i dytë pastaj i goditi psikologjikisht lojtarët. Në pjesën e dytë shkurtuam me Mandelën, por kaq. Nuk sakrifikuan si me Bylisin, Tomorin e Burrelin”.

FERIZ FERIZAJ- PANORAMASPORT.AL

NDIQE LIVE "PANORAMA TV"

---