Largimi i Roberto Mançinit nga drejtimi i Italisë do të ketë pasoja. Në zyrat e Federatës Italiane nuk u del inati nga mënyra se si trajneri i braktisi për të shkuar në Arabinë Saudite dhe për këtë arsye po bëhen gati që t’i hapin çështje gjyqësore.

Në lojë nuk është vetëm prestigji dhe imazhi që i ka dëmtuar rëndë, pasi përfaqësuesja ka gjetur një tjetër trajner me emër si Spaleti. Por mbi të gjitha fakti se si ai praktikisht nënvlerësoi autoritetin e drejtuesve të futbollit italian, duke shkuar i qetë për të fituar milionat në Arabinë Saudite.

Pas mbledhjes së Këshillit Federal të FIGC, presidenti Gabriele Gravina, ka deklaruar se janë hedhur hapat e parë për një çështje gjyqësore, ku t’i kërkohej dëmshpërblim trajnerit.

“Informova Këshillin për gjithçka ndodhi në gusht, sa i përket ndërprerjes së menjëhershme të kontratës teksa paraqiti dorëheqjen. Këshilli vendosi që t’i jepet mandat një profesionisti për të marrë një mendim ligjor që të mësohet nëse ekziston mundësia e kërkesës së një dëmshpërblimi”, tha ai.

PANORAMASPORT.AL

NDIQE LIVE "PANORAMA TV"

---