Ndeshja e prapambetur, korçarët gjunjëzojnë Pogradecin në kryeqytet
Lojtari përplas kokën, del me barelë nga fusha
Skënderbeu nuk ndalet, triumfon në ndeshjen e prapambetur të fazës së parë kundër Pogradecit dhe tashmë “kërcënon” kreun e renditjes. Ndërsa sulmuesi i tyre, Amarildo Dimo, përfundoi në spital pas një përplasjeje me një lojtar kundërshtar.
Kampionët në fuqi kanë mposhtur 3-0 fqinjët në sfidën e zhvilluar në “Qemal Stafa”, për shkak të dënimit të fushës së klubit korçar. Liqenorët kanë rezistuar vetëm 37 minuta, teksa një dorë Skënderbeut i ka dhënë ish-mbrojtësi Edi Çajku. Ky i fundit, prej dy sezonesh pjesë e Pogradecit, ka shkaktuar një autogol, duke u dhënë avantazhin korçarëve. Kualitetet e skuadrës bardhekuqe bënë diferencën, ndërkohë që në shumicën e kohës gjatë pjesës së parë Pogradeci ishte i vendosur mirë në fushë. Gjithsesi, goli i parë prishi ekuilibrat dhe i dha krahë Skënderbeut, që më pas dominoi totalisht ndeshjen. Shkëmbi, Xhafaj, Bratiç etj. konfirmuan edhe dje formën e mirë. Kapiteni i korçarëve u bë sërish protagonist me pasimet e tij perfekte, që në disa raste edhe nuk u shfrytëzuan nga sulmuesit. Pak para ndeshjes, stafi i liqenorëve vendosi që të mos aktivizonte sulmuesin vlonjat, Ardi Shehaj, i cili ishte i dëmtuar. Sakaq, liqenorët tentojnë të befasojnë me ndonjë kundërsulm, duke u bazuar nga krahu i majtë me Begajn. Megjithatë, me kalimin e minutave, korçarët udhëheqin lojën dhe krijojnë raste të njëpasnjëshme. Shkëmbi bëhet protagonist me goditjet e dënimit, derisa del në dritë goli i avantazhit. Si rezultat i një presioni të madh në portën liqenore, për Skënderbeun mendoi Çajku, që shkaktoi një autogol. Dy minuta më vonë, një përplasje me kokë mes Idrizit dhe Dimos bëri që ky i fundit të pësonte traumë dhe të dilte me barelë nga fusha. Më pas, lojtari u dërgua në spital për ekzaminime të mëtejshme. Në 45 minutat e dyta, Allmuça, që kishte zënë vendin e Dimos, dyfishon që në pesë-minutëshin e parë duke qetësuar korçarët. Pas këtij goli, Pogradeci duket i dorëzuar pas këtij goli, ndërsa bardhekuqtë janë gjithnjë në sulm. Një aksion me protagonist Biskupin nga e djathta mbyllet me eurogolin e Bratiçit. Pas këtij momenti, ndeshja nuk ka më histori. Pogradeci bën përpjekje për të shënuar golin e nderit, por nuk ka forcën e duhur për të qenë i rrezikshëm përballë Shehit. As dy minutat shtesë nuk sjellin ndonjë ndryshim dhe sfida përfundon 3-0. Tashmë, pas 13 ndeshjesh të fazës së parë, Skënderbeu i afrohet Tiranës së vendit të dytë me 1 pikë dhe Teutës kryesuese me 6.
Superioria
Dje (e prapambetur)
Skënderbeu-Pogradeci 3-0
Shënues: Çajku 38′ (autg), Allmuça 56′, Bratiç 64′
Java e 14-të
Nesër
Laçi-Vllaznia 14:00
Teuta-Tirana 17:00
Të shtunën
Kamza-Flamurtari 14:00
Shkumbini-Bylis 14:00
Të dielën
Tomori-Skënderbeu 13:00
Pogradeci-Kastrioti 14:00
Të hënën
Dinamo-Apolonia 14:00
Renditja
Nr. Ekipi ND F B H P
1. Teuta 13 10 2 1 32
2. Tirana 13 8 3 2 27
3. Skënderbeu 13 7 5 1 26
4. Kastrioti 13 7 2 4 23
5. Flamurtari 13 6 4 3 22
6. Bylis 13 5 3 5 18
7. Shkumbini 13 5 3 5 18
8. Vllaznia 13 5 2 6 17
9. Kamza 13 4 2 7 14
10. Pogradeci 13 5 1 7 13
11. Laçi 13 4 5 4 11
12. Tomori 13 3 2 8 11
13. Apolonia 13 2 2 9 8
14. Dinamo 13 0 4 9 1
SHËNIM: Laçi; – minus 6 pikë (dënuar nga Disiplina). Pogradeci; – minus 3 pikë (dënuar nga Disiplina). Dinamo; – minus 3 pikë (dënuar nga FIFA).
© Panorama.al
