Më shumë se katër vjet pas fillimit të pushtimit rus të Ukrainës, presidenti ukrainas, Volodymyr Zelensky beson se konflikti më i madh ushtarak në Evropë që nga viti 1945 po fillon gradualisht të kthehet në favor të Ukrainës.
Në një intervistë për The Guardian, Zelensky tha se Rusia po e humbet përditë edhe më shumë luftèn në Ukrainë.
“Nuk mund të themi se Rusia po e humbet luftën. Por mund të themi se po e humbet iniciativën çdo ditë, ditë pas dite”, u shpreh ai.
Sipas presidentit ukrainas, Vladimir Putin ka gënjyer që nga dita e parë e luftës, kur pretendoi se pushtimi ishte i nevojshëm për të shpëtuar popullatën rusishtfolëse të Ukrainës. Këto pretendime, beson ai, veprojnë si një lidhje kohezive që mban së bashku segmente të ndryshme të shoqërisë ruse.
Zelensky tha se gjithmonë ia ka shprehur edhe presidentit të SHBA, Donald Trump se Putin po gënjen dhe po bën lojëra.
“Gjithmonë i kam thënë Presidentit Trump se Putin po gënjen. Ai po luan lojëra me ju, me Shtëpinë e Bardhë”, u shpreh Zelensky, ndërsa shprehu mirënjohjen e tij për popullin amerikan për mbështetjen që i ka ofruar Ukrainës.
Në frontin diplomatik, Zelensky beson se Rusia ka pësuar një sërë humbjesh të rëndësishme politike në muajt e fundit. Ai kujtoi se në prill, aleati më i ngushtë politik i Putinit në Evropë, Viktor Orban, u mund në zgjedhjet hungareze. Në të njëjtën kohë, përpjekjet e Moskës për të mbështetur kandidatët pro-rusë në Moldavi dhe, së fundmi, në Armeni nuk kanë dhënë rezultatet e pritura.
“Ata po humbasin ndikimin në vende të ndryshme, përfshirë Azerbajxhanin. Ata janë të izoluar brenda Evropës dhe nga Shtetet e Bashkuara. Ata janë vetëm“, shtoi ai.
Zelensky beson se fitorja e vërtetë do të vijë kur vetë shoqëria ruse të kuptojë koston e konfliktit.
“Fitorja në këtë luftë do të jetë momenti kur shoqëria ruse të pranojë se lufta është diçka e tmerrshme, se është një tragjedi jo për dikë tjetër diku, por për veten e tyre. Dhe mendoj se aty po shkojnë gjërat”, thotë ai.
Presidenti ukrainas zbuloi gjithashtu se në maj pati një takim në Kiev me miliarderin rus dhe ish-pronarin e Chelsea, Roman Abramovich. Sipas Zelenskyt, gjatë takimit ai e bëri të qartë se Ukraina nuk do ta braktisë Donbasin, siç dëshiron Moska.
“Mendoj se ka njerëz të ndryshëm rreth Putinit. Gjysma e tyre duan ta vazhdojnë këtë luftë. Gjysma duan ta ndalojnë. Dhe mendoj se njerëzit që janë nga biznesi, e kuptojnë se ekonomia është në një situatë të tmerrshme në Rusi. Është shumë afër kolapsit.”
© Panorama.al
