Organizata e Konferencës Islamike (OKI), nëpërmjet një rezolute për situatën në Kosovë ka kërkuar nga të gjitha shtetet anëtare njohjen e Kosovës.
Rezoluta u miratua në sesionin e 38 të Këshillit të Ministrave të Jashtëm, të zhvilluar në Astana të Kazakistanit.
Organizata në pikën e 8 të rezolutës së miratuar i bën thirrje të gjitha shteteve anëtare, për herë të parë, që të marrin në konsideratë njohjen e Kosovës, duke u bazuar në të drejtat e tyre të lira dhe sovrane si dhe përputhje me praktikat e tyre kombëtare.
Rezoluta njeh vendimin e dhënë më 22 korrik 2010 të Gjykatës Ndërkombëtare të Drejtësisë për shpalljen e Pavarësisë së Kosovës, ku thuhej se shpallja e Pavarësisë nuk ka shkelur as ligjet e të drejtës ndërkombëtare e as rezolutat relevante.
Organizata e Konferencës Islamike, është organizata e dytë më e madhe ndër qeveritare pas Kombeve të Bashkuara, me gjithsej 57 shtete anëtare nga katër kontinente të ndryshme.
© Panorama.al
