Drejtori i AKP, Harizaj: Incidentet nuk cenuan procesin voluminoz.
Për Ministrinë e Arsimit kopjet e maturantëve nëpërmjet Facebook-ut në prov-imet me zgjedhje nuk kërcënojnë procesin e Maturës Shtetërore.
Gjatë një konferencë për shtyp, drejtori i AKP-së, Alfons Harizaj, pranoi se një gjë e tillë ka ndodhur dhe ndëshkimet do të jenë individuale. “Mund të ketë ndodhur dhe ka ndodhur, por këto janë njolla shumë të vogla në krahasim më të gjithë procesin. Penalizimet do të jenë sipas rregullores së Maturës Shtetërore në mënyrë individuale. Do të ketë skualifikim nga provimi për nxënësit ose zbritje të pikëve për pyetjet me zhvillim dhe alternativa. Në asnjë rast nuk do të kemi ndëshkime kolektive”, tha Harizaj. Sipas tij, dyshimet për kopje verifikohen nga një komision i posaçëm. Harizaj reagoi dje edhe në lidhje me 4 mësuesit e arrestuar në Kamzë. Ata u ofruan nxënësve zgjidhjen e pyetjeve të tezës së provimit të Letërsisë, nëpërmjet SMS-ve, kundrejt pagesave prej 25-30 mijë lekësh. “Këta mësues nuk kanë qenë të përfshirë në listën e administratorëve që Ministria ka miratuar. Janë mësues, por kanë qenë pranë shkollave si të gjithë qytetarët e thjeshtë. Ky incident nuk cenon punën voluminoze të bërë nga MASH”, tha Harizaj. Dje pasdite, MASH publikoi notat e provimit të Matematikës. Gazeta publikon listat me kodet ID të nxënësve. Sipas MASH-it, nesër do të nisë korrigjimi i testeve të lëndëve me zgjedhje. Po kështu, këtë javë do të publikohet formulari A2. Për herë të parë këtë vit maturantët do ta plotësojnë online. Me anë të tij ata zgjedhin 10 preferencat e shkollës së lartë. Plotësimin e A2 nxënësit do ta bëjnë vetëm pasi të kenë marrë edhe notat e lëndëve me zgjedhje. Me rezultatet e gjithë komponentëve të Maturës ata do të llogarisin pikët sipas formulave me koeficientet përkatës për profilin e shkollës dhe universiteteve.
Të arrestuarat: S‘përfituam para.
Mësueset: Ndihmuam nxënësit për miqësi
TIRANE – Mësueset e shkollës së mesme “Ibrahim Rugova” në Kamzë, të arrestuara të shtunën me akuzën e korrupsionit me tezat e provimeve të maturës, nuk e kanë pranuar kryerjen e krimit. Shtetaset Klodiana Kryemadhi, 33 vjeçe, Fatbardha Mahmutaj, 49 vjeçe, Arjana Metaliaj, 32 vjeçe dhe Nevila Fiku, 47 vjeçe, të gjitha mësuese pranë shkollës së mesme të përgjithshme “Ibrahim Rrugova” në Kamzë, janë marrë në pyetje nga hetuesit pas arrestimit nga policia. Sipas burimeve nga hetimi, mësohet se mësueset kanë mohuar të kenë përfituar financiarisht nga zgjidhja e testeve dhe dërgimi i përgjigjeve te maturantët. Mësueset mësohet se kanë pretenduar se kanë ndihmuar disa nxënës për shkak të njohjes me ta dhe me prindërit e tyre, por nuk ka pasur përfitim në këtë mes. Nga ana tjetër, burimet e Prokurorisë dhe Policisë kanë thënë se ka prova të plota që tregojnë se mësueset e arrestuara kanë përfituar nga 25 deri në 30 mijë lekë për zgjidhjen e secilës tezë në tri provimet, Matematikë, Letërsi dhe lëndë me zgjedhje. Sipas hetimeve, mësuesja e fizkulturës pranë kësaj shkolle ishte lidhur me prindërit e dy vajzave maturante, nga të cilët kishte marrë ryshfet. Ajo i ka ndarë paratë me tri mësueset e tjera nga të cilat ka mësuar përgjigjet e pyetjeve. Pasi kanë hyrë në sallat e provimeve me telefon, nxënësit i kanë marrë përgjigjet duke plotësuar kështu fletët e testit. Prokuroria e Tiranës, e cila ka drejtuar hetimet, pritet që ditën e sotme të dërgojë në Gjykatë kërkesat për caktimin e masave të sigurisë ndaj mësueseve të arrestuara. Rasti më tipik i abuzimit të tyre me detyrën ka qenë provimi i Letërsisë dhe përgjigjet për pyetjen e poezisë “Albatros”. tr.so
Per notat e matematikes klikoni ketu: http://www.panorama.com.al/wp-content/uploads/2012/07/matematikapdf2012.pdf
ZIRINA LLAMBRO
© Panorama.al
