Plot 41 mijë e 142 maturantë iu nënshtruan dje provimit të parë të Maturës Shtetërore, atij të Gjuhës dhe Letërsisë.Për rreth 2 orë e 30 minuta ata zgjidhën testin me 25 pyetje, të cilat sipas autoriteteve të arsimit janë shkëputur nga programet mësimore. Rreth orës 2 u publikua çelësi i përgjigjeve të sakta. Për shkak të numrit të lartë të klikimeve, faqja zyrtare e Ministrisë së Arsimit ishte e bllokuar deri në mbrëmje vonë. Gazeta publikon përgjigjet e sakta për gjimnazet e përgjithshme dhe ato të profilizuar. Pas testit, maturantët thanë se pyetjet ishin të nivelit mesatar, ndërkohë që sipas tyre ka qenë e pamundur të kopjohej, pasi ka pasur rregulla të rrepta. Për herë të parë këtë vit, nëse maturantët nuk kalojnë katër provimet, atëherë humbasin të drejtën për t’u ulur në auditorët e universiteteve. Sipas drejtuesve më të lartë të Ministrisë së Arsimit, matura e këtij viti nuk shënoi asnjë incident. “Nëse edhe 3 provimet e tjera do të jepen në të njëjtën mënyrë si letërsia, atëherë ju them me plot gojën se kjo do të jetë matura me e mirë e realizuar deri tani. Ka pasur një ndërgjegjësim të nxënësve, shumë pak raste kur është tentuar të komunikohet”, shprehen specialistët e MASH. Megjithatë, mes maturantëve ka variante nga më të ndryshmet. Nuk kanë munguar edhe aludimet për kopje, por asgjë zyrtare dhe e vërtetuar. Maturantët këtë vit do të pajisen me diplomën e maturës, e cila do të tërhiqet pranë agjencisë së provimeve, dhe jo në shkolla. Pas 10 ditësh pritet të dalin rezultatet e provimit. Vlerësimi do të kryhet në 6 qendra, dy prej së cilave në Tiranë, të tjerat në rrethe. Është një grup specialistësh i trajnuar më parë që do të merret me korrigjimin e testeve. Maturantët kanë të drejtë të tërheqin një fotokopje të testit, vetëm pasi të kenë përfunduar të gjithë provimet e detyruara. Vlerësimi do të bëhet në dy duar specialistësh, për të qenë sa më objektiv. Më 15 qershor ata do t’i nënshtrohen provimit të dytë, atij të matematikës. I gjithë procesi i Maturës Shtetërore do të mbyllet më 30 qershor, kur maturantët të japin dy lëndët me zgjedhje. Më pas, me marrjen e rezultateve për këto lëndë, maturantët do të plotësojnë formularin A2. Me anë të tij do të mund të përzgjedhin 10 preferencat ku do të konkurrojnë për në shkollat e larta.
Vlerësimi
Skema e vlerësimit është një standard vlerësues i njëjtë për çdo maturant. Sipas rregullores, vlerësimi i çdo përgjigjeje të dhënë nga kandidati për kërkesën përkatëse mbështetet në skemën e vlerësimit të përgatitur nga hartuesit e testeve. Vlerësimi i përgjigjeve të maturantëve në provimet e detyruara dhe me zgjedhje bëhet me pikë, të cilat ekuivalentohen në notë. Pas përfundimit të çdo provimi të maturës, AVA shpall skemën e vlerësimit të testit.
Privatet
Provimet e maturës do të jenë kusht pranimi edhe për kandidatët që do t’u drejtohen universiteteve private. Ndryshe nga vitet e shkuara, pranimet për vitin akademik 2011-2012 do të shoqërohen me kritere më të rrepta jo vetëm për institucionet e arsimit të lartë publik, por dhe për strukturat private. Nxënësit e viteve të katërta do të duhet të mësojnë shumë për të marrë të katërta provimet, që të fitojnë një të drejtë studimi, rregull ky që do të jetë kriter pranues edhe për universitet private.
Provimet
Ndryshimet e bëra në maturën e vitit 2011 konfirmojnë se maturantët, nëse nuk kalojnë provën e provimeve me zgjedhje krahas atyre të detyruara, nuk e kanë mbaruar shkollën e mesme e, për rrjedhojë, nuk do të lejohen të vijojnë procedurën për ndjekjen e studimeve të larta. Për rrjedhojë, marrja e notave kaluese në katër provimet do të jetë kushti bazë për të vijuar garën për pranimet në universitet gjatë vitit akademik 2011-2012.
Per te pare artikullin e plote atehere klikoni mbi: PDF
© Panorama.al
