NGA MIMOZA DAJÇI 
Në një nga sallat prestigjioze të OKBsë në Nju Jork u mbajt Tubimi i Paqes, i cili shërben për të promovuar sigurinë globale të paqes, duke i kushtuar më shumë vëmendje agjendës së paqes dhe sigurisë për gratë, bazuar në rezolutën 1325 të Këshillit të Sigurimit.
Tubimi i Paqes shënoi 23-vjetorin e rezolutës 1325 të Këshillit të Sigurimit të OKB-së mbi paqen, barazinë gjinore, sigurinë dhe fuqizimin e grave. Duke synuar kështu rritjen e ndërgjegjësimit për rëndësinë e rezolutës dhe ndikimin e saj për paqen dhe sigurinë globale. Për më tepër, ky takim do të ofronte një platformë për zërat ndryshe, duke i bashkuar në një thirrje për veprim kolektiv, drejt një bote më paqësore dhe gjithëpërfshirëse gjinore.
“Together, we can make a difference”. Përkujtimi i kësaj rezolute paraqet një mundësi reflektimi mbi punën e deritanishme dhe përparimit që duhet bërë akoma për të arritur barazinë gjinore, pasi të gjithë së bashku mund të bëjmë ndryshimin. Riorganizimi i kësaj rezolute të rëndësishme synon nxitjen për të vepruar dhe fuqizuar gratë që të marrin një rol aktiv në ndërtimin e një bote paqësore dhe të sigurt.
Ftesë për pjesëmarrje për këtë tubim pati edhe Organizata e Gruas “Shpresë & Paqe” (The Women’s Organization “Hope & Peace”) në Nju Jork. Në përmbajtje të rezolutës flitet edhe për ndikimin e grave udhëheqëse në parandalimin dhe zgjidhjen e konflikteve të armatosura. Ku një ndër misionet e kësaj organizate është edhe slogani “Stop armëve” kundër dhunës, kundër luftës e pro paqes.
Si femra shqiptare që jetojmë e punojmë në SHBA, na shqetëson fakti se akoma nuk janë njohur botërisht masakrat e përdhunimet ndaj grave e vajzave nga makineria serbe gjatë luftës në Kosovë. Si dhe ngjarjet e rënda që po ndodhin në familjet shqiptare, ku burri godet e vret gruan apo bashkëjetuesen në sy të fëmijëve të mitur, sikur ta ketë pronë e skllave të tij.
Ligjet duhen parë e forcuar si në Shqipëri e Kosovë, për një jetë të qetë, në paqe e të sigurt për nënat, gratë e fëmijët e pafajshëm, proces që kërkon edhe ndërgjegjësimin e shoqërisë civile. Këto Ligje të zbatohen e kriminelët të marrin dënimin që u takon.
NDIQE LIVE "PANORAMA TV" © Panorama.al
