Pasditen e djeshme kryeministri, Sali Berisha ka pritur në rezidencën qeveritare në qytetin e Vlorës, presidenten e Kosovës, Atifete Jahjaga. Jahjaga po qëndron për disa ditë pushime në bregdetin shqiptar.
Në takim, kryeministri Berisha vlerësoi rolin që presidentja Jahjaga ka luajtur e po luan në rritjen dhe konsolidimin e Republikës së Kosovës si faktor paqeje dhe stabiliteti në Ballkan dhe vendosmërinë e autoriteteve të qeverisë së Kosovës për zbatimin e ligjit dhe të rendit kushtetues në të gjithë territorin e saj.
“Funksionimi i shtetit ligjor dhe institucional kanë bërë që Kosova gjithnjë e më shumë të shndërrohet në një faktor të rëndësishëm bashkëpunimi, mirëkuptimi e integrimi rajonal”-u shreh Berisha.
Presidentja Jahjaga e ka falënderuar kryeministrin Berisha për të gjithë mbështetjen që ai i ka dhënë dhe i jep Republikës së Kosovës.
Në këtë takim u diskutua gjerësisht mbi bashkëpunimin politik dhe në të gjithë fushat midis Shqipërisë dhe Kosovës, për përpjekjen e përbashkët në njohjen e mëtejshme dhe konsolidimin e pozicionit ndërkombëtar të Republikës së Kosovës, njofton zyra e shtypi të kryeministrit.
© Panorama.al
