Krim pasioni në Lushnjë, vriten një djalë dhe një grua në lokal

LUSHNJE/ Qëllon 27-vjeçaren dhe klientin që po ndante sherrin.

Xhelozia shkakton dy viktima në Lushnjë. Plumbat e kallashnikovit kanë lënë të vdekur në vend Rajmonda Sotën, 27 vjeçe, në një lokal të fshatit Toshkëz, ndërsa u plagos rëndë, për të ndërruar jetë në spital 24-vjeçari Marsel Cani.
Autori i vrasjes së dyfishtë është identifikuar shtetasi Erjon Cjapi, 32 vjeç, banor i fshatit fqinj, Delisufaj. Sipas dëshmitarëve në vendin ku ndodhi krimi, Cani ka qenë brenda në lokal kur nisi dhe debati, i cili do të çonte në dy viktima në pak minuta. Burime të Policisë, bazuar te dëshmitë e para të mbledhura në vendin e ngjarjes, flasin për një krim sentimental. Erjon Cjapi mësohet se kishte pasur një lidhje të hershme me 27-vjeçaren Sota, e cila ishte e martuar dhe nënë e një fëmije. Ngjarja e rëndë ka ndodhur në fshatin Toshkëz të Lushnjës, rreth orës 21:15 të mbrëmjes të së shtunës. Banori i fshatit Delisufaj, Erjon Cjapi, ka shkuar në mbrëmje në Toshkëz, pikërisht në lokalin ku punonte 27-vjeçarja, me të cilën, sipas burimeve të brendshme të Policisë, mendohet të ketë pasur lidhje intime deri pak kohë më parë. Por plumbave të agresorit nuk i ka shpëtuar as 24-vjeçari Marsel Cani, edhe ky nga fshati Toshkëz i Lushnjës. Sipas konfirmimeve që vijnë nga vendngjarja, bëhet me dije se Sota ka qenë e ulur në një tavolinë me bashkëfshatarin e saj, Marsel Cani, në lokalin e familjes së bashkëshortit, i cili ishte emigrant në Greqi. Pak çaste më vonë, aty ka mbërritur ish i dashuri i saj, 32-vjeçari Cjapi, i cili ka debatuar në mënyrë verbale me të renë, madje kanë përdorur edhe fjalë fyese ndaj njëri-tjetrit. Mes të dyve ka ndërhyrë edhe 24-vjeçari Cani, me qëllim për ta zbutur situatën. Cjapi, në irritim e sipër është larguar, për t’u kthyer pak më vonë me një armë kallashnikov, të cilën e ka marrë nga autovetura e tij, duke qëlluar me breshëri në drejtim të Sotës, që ka mbetur e vdekur në vend dhe bashkëfshatarit të saj, që ka marrë plagë të rënda për jetën. Më pas, 32-vjeçari është larguar me shpejtësi nga vendngjarja me automjetin e tij. Banorë të fshatit Toshkëz kanë transportuar për në spitalin e Lushnjës trupin e viktimës dhe të djalit të plagosur, i cili ndërroi jetë pak më vonë në spital. Sipas burimeve konfidenciale të Policisë, 33-vjeçari Cjapi dhe viktima Rajmonda Sota kishin pasur një lidhje dashurore mes tyre, por kohët e fundit kishte pasur debate të shpeshta, deri në ndarje. Për këtë arsye, 32-vjeçari Cjapi, për shkak të xhelozisë, ka shkuar në lokalin ku punonte Rajmonda, me qëllim që të nxirrte inatin e tij. Kur e ka parë në shoqërinë e një djali tjetër, i cili ishte thjesht një bashkëfshatar i Sotës dhe pasi kanë shkëmbyer fjalë fyese me njëri-tjetrin, Cjapi ka vendosur t’i “ndëshkojë” duke u marrë jetën. Policia ka arritur të gjejë disa kilometra më larg dhe të sekuestrojë në cilësinë e provës material autoveturën e 32-vjeçarit Cjapi dhe armën e krimit. Burimet e bluve pohojnë se kanë nisur të krehin të gjithë zonën në kërkim të autorit të vrasjes së dyfishtë.

Viktimat
Rajmonda Sota,
27 vjeçe, banuese
në fshatin Toshkëz

Marsel Cani,
24 vjeç, banues
në Toshkëz

Autori
Erjon Cjapi,
32 vjeç, banues
në Delisufaj

LUSHNJE/ MAJLINDA RAMA

© Panorama.al