Ndaj Katarit në stadiumin e Rajo Valekanos, me Iranin në impiantin e Beshiktashit.
De Biazi grumbullon Erbim Fagun dhe Emiljano Veliajn.
Erbim Fagu dhe Emiljano Veliaj janë dy emrat e rinj që trajneri i Kombëtares, Xhani De Biazi, ka grumbulluar për miqësoren ndaj Katarit dhe Iranit. Fagu ka rënë në sy të teknikut pas lojës së mirë në ndeshjen e fundit në finalen e kupës me Tiranën, ndërsa Veliaj mësohet se ka qenë në planet e De Biazit që më parë dhe pas rikuperimit nga dëmtimi lojtari është vënë në dispozicion edhe të ekipit përfaqësues. Faktikisht, thirrja e këtyre të fundit ka qenë disi e kushtëzuar, kjo për shkak të dëmtimit që ka pësuar mesfushori i Skënderbeut, Gjergji Muzaka, në finalen e kupës ndaj Tiranës. Me probleme është edhe mbrojtësi shkodran i Karabakut (Azerbajxhan), Admir Teli. Sipas informacioneve, të dy këta lojtarë nuk do të jenë pjesë e skuadrës të paktën në ndeshjen ndaj Katarit, e cila do të luhet në Spanjë në stadiumin e Rajo Valekanos. Konfirmimi për stadiumin ka ardhur dje nga Federata Shqiptare e Futbollit. Impianti ka një kapacitet prej 15.500 vendesh të ulura, në Valekano, në periferi të Madridit. Ndërkohë konfirmohet se ndeshja tjetër miqësore, ajo e 27 majit ndaj Iranit, do të luhet në “Inonu Stadium”, në Stamboll. Impianti prej më shumë se 32 mijë vendesh të ulura është shtëpia e Beshiktashit. Skuadra jonë përfaqësuese është grumbulluar dje për herë të parë në Durrës dhe sot tekniku ka programuar dy seanca stërvitore. Pritet që udhëtimi drejt Spanjës, sipas programit, të bëhet ditën e nesërme dhe në Madrid janë programuar të zhvillohen edhe dy seanca të tjera stërvitore para ndeshjes së 22 majit.
© Panorama.alKosovari Brahimi mungon ndaj Katarit
Mërgim Brahimi nuk do të jetë pjesë e skuadrës sonë përfaqësuese për ndeshjen ndaj Katarit. Lojtari i Grashopersit, i cili më parë ka luajtur me ekipin Shpresa, u grumbullua nga De Biazi falë formës së mirë që po kalon. Por dje ai ka kërkuar leje pasi skuadra ku aktivizohet do ketë një ndeshje “play-off” në kampionatin zviceran, ku Brahimi nuk dëshiron që të mungojë. Kujtojmë se Brahimi ka luajtur me U-21 të Shqipërisë në rolin e organizatorit, duke shfaqur një repertor të pasur teknik dhe horizont në lojë.
