Kanadezët, gati të nisin kërkimin dhe prodhimin e arit e bakrit në Shqipëri

Nga eksplorimi në prodhim bakri, zinku dhe ari. Kompania kanadeze me qendër në Vankuver, Tirex Resourses, tashmë ka përfunduar me kërkimet e saj dhe ka lajmëruar qeverinë shqiptare se do të kthejë disa nga koncesionet e saj të eksplorimit në koncesione minerare. Sipas një njoftimi në sajtin proactiveinvestors.com, bëhet me dije se kompania po planifikon që në një periudhë të afërt të fillojë prodhimin në gjashtë depozita në rajon, duke shenjëstruar bakrin dhe arin, gjithashtu edhe kërkimin e zinkut. Këto depozita volkanogjene, të konsideruara që kanë pasuri të madhe si rezultat i aktiviteteve vullkanike dhe aktiviteteve hidro-termale, përfaqësojnë një burim të mirë të bakrit, zinkut, arit dhe argjendit. Zonat që përfshihen nga rajoni i Mirditës kanë qenë në fokus të punës, programeve të qeverisë, pasi kanë depozita apo miniera në nivele të ndryshme zhvillmi. “Disa nga këto depozita ishin miniera prodhimi, ndërkohë që të tjerat kanë qenë afër kësaj shkalle, kur në Shqipëri u kap nga ngërçi në funksionimin e industrisë minerare si efekt i demokratizimit dhe privatizimeve”, shprehen përfaqësues të Tirex. Puna e kësaj kompanie gjatë katër viteve të kaluara është fokusuar në rindërtimin dhe rivlerësimin e të dhënave të Shqipërisë për këto depozita. Në mars, Tirex arriti të hynte në prodhim në Shqipëri përmes një marrëveshjeje me Ekin Maden, një kompani e madhe metalesh dhe mineralesh turke. Duke zbatuar një marrëveshje, të dyja kompanitë u bashkuan si një entitet i vetëm dhe i ri, ku secila do të kishe 50 për qind të fitimit. Tirex do të vërë në dispozicion gjashtë depozitat e saj në Mirditë, ndërkohë që Ekin do të financojë zhvillimin minerar edhe në krijimin e kapaciteteve përpunuese. “Kjo sipërmarrje e Tirex për prodhimin e arit dhe bakrit vjen në një kohë ndryshimesh të mëdha në Shqipëri si taksa e sheshtë 10 për qind për korporatën dhe si taksë personale, anëtarësia në NATO, synimi drejt BE-së dhe një demokraci parlamentare”, shprehet kompania në një deklaratë të saj. Tirex synon që programin e saj të prodhimit ta zhvillojë në Mirditë. Ndërkohë që zonat e reja të eksplorimit do të përzgjidhen sipas rifreskimeve më të fundit që u janë bërë të dhënave dhe hartave në vitin 2010, pak përpara fillimit të dimrit.

© Panorama.al