Tiranë, Erjon Cërriku u rrëmbye dhe kërcënua, policia: Ishin 5 persona.
Një 27-vjeçar, i liruar nga burgu prej disa muajsh, është mbajtur peng për më shumë se 24 orë nga pesë persona, dy prej të cilëve janë identifikuar dhe shpallur në kërkim nga policia.
Ngjarja e ka zanafillën të mërkurën rreth orës 10:30, në rrugën “Myslym Keta”, në një lokal që ndodhet pranë zonës së Freskut në Tiranë. Pasi e kanë marrë aty të liruarin nga burgu, pengmarrësit kanë udhëtuar bashkë me të dëmtuarin, Erjon Cërriku, drejt një fshati të Shijakut duke i hequr lirinë në mënyrë të paligjshme 27-vjeçarit, të cilin e kanë liruar në orën 01:00 pas mesnate, në afërsi të kthesës së Kamzës në Tiranë. Burime nga Policia thanë se ngjarja dyshohet të ketë ndodhur për 2500 euro, të cilat Cërriku i kishte përfituar nga shitja e një motori, që dyshohet të ketë qenë i vjedhur në Durrës. Për këtë arsye, personat që kanë blerë këtë mjet i kanë kërkuar paratë që i kishin paguar. Të njëjtat burime thanë dje se në pengmarrje janë përfshirë pesë persona, por vetëm dy prej tyre janë identifikuar deri tani. Sipas Policisë, personat e shpallur në kërkim për ngjarjen e denoncuar nga Erjon Cërriku janë Amarildo Kolvani, 27 vjeç dhe Erjon Dervishi, 25 vjeç, pronarët e lokalit të basteve sportive ku u mor peng i dëmtuari. Nga deklarimet që ka dhënë në polici 27-vjeçari, i cili ka qenë i proceduar disa herë më parë për vepra të ndryshme penale, rezulton të jetë kërcënuar, keqtrajtuar dhe goditur në kokë me tytë pistolete. Ndërsa është shprehur se tre autorët e tjerë të ngjarjes nuk ka arritur t’i identifikojë, pasi kokën ia kishin mbuluar me një thes.
PENGMARRJA
Mëngjesin e së mërkurës, Erjon Cërriku ka dalë nga shtëpia e tij në Yzberisht të Tiranës dhe ka shkuar në afërsi të zonës së Freskut, ku do të takohej me dy personat, Amarildo Kolvani dhe Erjon Dervishi, në lokalin e tyre loto-sport. Rreth orës 10:30, pasi kanë debatuar për një shumë parash që njëri prej pronarëve i kishte paguar Cërrikut për një motor që ai u kishte shitur. Ata pretendonin se 27-vjeçari i ka mashtruar, pasi motori nuk ishte në pronësi të tij, por të disa djemve nga Durrësi dhe rezultonte i vjedhur. Menjëherë pas debatit, dy të dyshuarit, Kolvani dhe Dervishi, e kanë detyruar Cërrikun që të hipë në makinën e tyre tip “Passat” dhe më pas i kanë vendosur një thes në kokë dhe kanë udhëtuar drejt Shijakut. Atje, autorëve i janë bashkuar edhe tre persona të tjerë, të cilët në bashkëpunim me njëri-tjetrin e kanë kërcënuar, rrahur dhe goditur me tytën e pistoletës në kokë. Nën kërcënimin e armës ata i kanë kërkuar 2500 euro, nga 2000 euro që ai u kishte shitur motorin, dhe pasi ai u ka premtuar se do ua kthejë paratë, e kanë transportuar me makinë deri te Kthesa e Kamzës dhe pasi e kanë hedhur në tokë, janë larguar.
ETLEVA DELIA
© Panorama.al
