Ministri i Turizmit, Kulturës dhe Sportit, Blendi Gonxhja priti në takim maestro Shlomo Mintz, një nga figurat më të shquara të muzikës klasike botërore.
Ai dha edhe lajmin se vitin e ardhshëm do mbahet organizimi “Violinat e shpresës”, me instrumente muzikore artefakte nga kampet e përqendrimit gjatë Holokaustit.
“U fol më gjerë mbi ide e nisma të përbashkëta që do të pasurojnë jetën kulturore të vendit dhe do të mbështesin brezat e rinj të muzikantëve, duke përfshirë potencialin për masterkurse dhe programe që reflektojnë përvojën e tij të gjerë si themelues, drejtues artistik dhe anëtar jurish në konkurse ndërkombëtare nga më të njohurat”, shprehet Gonxhja me një postim në rrjetin social Facebook.
Ministri vlerësoi angazhimin e maestro Mintz për të ndarë ekspertizën e tij dhe kontributin e tij afatgjatë në formimin e talenteve të rinj në vendin tonë.
Postimi i plotë i ministrit Blendi Gonxhja:
“Me maestro Shlomo Mintz, një ndër figurat më të shquara të muzikës klasike botërore , violinist, dirigjent dhe pedagog me një karrierë që nisi që në fëmijëri, kur në moshën 11-vjeçare debutoi me Orkestrën Filarmonike të Izraelit dhe vetëm dy vite më vonë interpretoi Koncertin e Paganinit. I formuar nga pedagogë të mëdhenj si Ilona Fehér dhe Dorothy DeLay në Juilliard, maestro Mintz ka ndërtuar një karrierë të jashtëzakonshme duke interpretuar me orkestrat dhe dirigjentët më prestigjiozë të botës, si dhe duke lënë gjurmë të rëndësishme në fushën e drejtimit orkestral dhe edukimit muzikor.
Ata diskutuan mbi mundësitë për të sjellë vitin tjetër një organizim madhështor, “Violinat e Shpresës”, me instrumenta muzikore artefakte nga kampet e përqëndrimit gjatë Holokaustit, ekspozimin dhe daljen në skenë të tyre, mes koncertesh e aktivitetesh muzikore por dhe edukative. Violinat e Shpresës kanë vizituar, ndër të tjera, qytetet e mëposhtme:
Paris, Francë; Jerusalem, Izrael; Sion, Zvicër; Madrid, Spanjë; Charlotte, SHBA; Monte-Karlo, Monako; Romë, Itali; Cleveland, SHBA; Meksiko Siti, Meksikë; Sarasota, SHBA; Buenos Aires, Argjentinë.
Projekti ofron gjithashtu një ekspozitë me mbi 40 instrumente dhe historitë e tyre individuale. Ajo është shfaqur tashmë në Charlotte, Karolina e Veriut; në Muzeun Maltz të Trashëgimisë Hebraike në Cleveland, Ohio; në Nashville, Tennessee; në hollin e Filarmonisë së Berlinit, Gjermani, dhe në shumë vende të tjera.
U fol më gjerë mbi ide e nisma të përbashkëta që do të pasurojnë jetën kulturore të vendit dhe do të mbështesin brezat e rinj të muzikantëve, duke përfshirë potencialin për masterkurse dhe programe që reflektojnë përvojën e tij të gjerë si themelues, drejtues artistik dhe anëtar jurish në konkurse ndërkombëtare nga më të njohurat.
Ministri Gonxhja vlerësoi angazhimin e maestro Mintz për të ndarë ekspertizën e tij dhe kontributin e tij afatgjatë në formimin e talenteve të rinj në vendin tonë. Jam i bindur se bashkëpunimet e ardhshme do të kontribuojnë ndjeshëm në promovimin e kulturës sonë në skenën globale”.
© Panorama.al
