“Lufta” mes republikanëve për të nxjerrë më të mirin që do të sfidojë Presidentin Barack Obama në nëntor të këtij viti, duket se po ashpërsohet çdo ditë. Debati i fundit “live” mes kandidatëve të deritanishëm është mbajtur dje në New Hampshire, ku fokusi i të gjithëve ishte përqendruar vetëm tek sulmi ndaj një individi. Kandidati kryesor i republikanëve, Mitt Romeny, është “bombarduar” me pyetje dhe kundërshtime nga pesë kandidatët e tjerë ende në garë, të cilët e kanë sfiduar dhe sulmuar duke mos lënë jashtë asnjë detaj lidhur me karrierën, pikëpamjet mbi edukimin social apo dhe familjen, por pika më e fortë e debatit ishin të drejtat e gay-ve. Aq i ashpër ishte sulmi në deklarata, sa për herë të parë që nga fillimi i kësaj gare u vunë në pikëpyetje kredencialet e kandidatit që ka qenë në krye të sondazheve të zhvilluara, më i fundit ai në Iowa javën e kaluar. Deri më tani, në garë mbeten gjashtë kandidatë republikanë, të cilët në muajt e ardhshëm do të përballen me debate të hapura në gjithë shtetet e SHBA-ve, deri në kurorëzimin e fituesit në konventën e partisë në muajin gusht gati për sfidën e vjeshtës. Deri më tani, në garë mbeten kandidati Mitt Romney ish-guvernator i Masachusetts, Rick Perry guvernator i Teksasit, Ron Paul, kongresmen i Teksasit, Rick Santorum ish-senator i Pensilvanisë, Neët Gingrich ish-zëdhënës në Shtëpinë e Përfaqësuesve, Jon Huntsman ish-guvernator i Utah. Gara për të zgjedhur republikanin që do të sfidojë Presidentin aktual të Shteteve të Bashkuara të Amerikës, Barack Obama, do të zhvillohet në të gjitha shtetet, duke dëgjuar alternativat e secilit në debate live.
