ITALI- Ministri italian i Punëve të Jashtme Giulio Terzi u shpreh sot se ka besim të plotë tek e ardhmja e Shqipërisë.
Ai tha se mbështet Shqipërinë në rrugën e saj drejt modernizimit ekonomik dhe shoqëror, si dhe dhënien e statusit kandidat për anëtarësim në Bashkimin Europian, deri në fund të këtij viti.
Terzi i bëri këto deklarata në forumin “Shqipëria në Europë, mundësi të reja bashkëpunimi ekonomik dhe industrial për sipërmarrjet italiane” organizuar nga Konfindustria.
Në këtë forum ishte i pranishëm edhe kryeministri Sali Berisha, i cili po qëndron në një vizitë zyrtare në Itali. Më herët gjatë një konference të përbashkët për shtyp, Berisha mori mbështetje për integrimin edhe nga homologu i tij, Mario Monti.
© Panorama.al
