Kryetari i Bashkisë së Tiranës, Lulzim Basha, priti dje në zyrën e tij aktoren e njohur shqiptaro-amerikane, Eliza Dushku.Basha i dhuroi aktores “Kullën e Sahatit të Tiranës”, simbolikën e qytetit, si dhe i bëri të ditur se do t’i propozojë Këshillit Bashkiak për t’i dhënë titullin “Qytetare Nderi e Tiranës” dhe emërimin si “Ambasadore Nderi e Tiranës në botë”. “Jam e nderuar dhe e privilegjuar”, tha Dushku, e cila hyri në zyrën e kryetarit të Bashkisë duke përshëndetur në shqip: “Përshëndetje!”. “Unë jam shumë i lumtur që Eliza ndodhet sot në Tiranë dhe besoj se flas edhe në emër të të gjithë qytetarëve të Tiranës, që e kemi pritur këtë vizitë me shumë kënaqësi. Të gjithë jemi entuziastë për vizitën e saj dhe do të shërbejë për ta vendosur Tiranën në hartën turistike të botës. Kam pasur nderin t’i propozoj sot, si dhe kënaqësinë që ajo pranoi të jetë Ambasadore Nderi e Tiranës në botë, e ngarkuar për artet, kulturën dhe turizmin”, tha Basha pas takimit me aktoren. Dushku i tha Bashës se ishte e befasuar nga energjia që kishte parë në Tiranë, si dhe u interesua më tej për planet dhe projektet që ka Bashkia. Basha e informoi aktoren e njohur për programin që ai ka për ta bërë Tiranën një qytet më të mirë për të gjithë. Kryetari i Bashkisë e njohu me planet për përmirësimin e cilësisë së jetës, për krijimin e hapësirave të gjelbra, ndërtimin e më shumë shkollave, si dhe për përpjekjet për ta bërë Tiranën një destinacion tërheqës për turizmin dhe biznesin. Ndërsa aktorja ka bërë edhe njëherë me dije projektin e saj për të promovuar në botë turizmin shqiptar. “Kam besim se kryetari i Bashkisë është i ndershëm dhe do të realizojë çfarë ka premtuar. Unë do të bëj të pamundurën ta 
ndihmoj për çfarë i kam premtuar, që ta promovoj Tiranën kudo. Shqipëria është vend turistik. Kam vizituar deri tani Tiranën dhe njerëzit këtu janë shumë të mirë. Do ta filloj turin nga Korça, për të promovuar turizmin shqiptar me anë të një dokumentari”, tha aktorja Dushku. Kryetari i Bashkisë e shoqëroi Eliza Dushkun në vizitën që ajo bëri te Muzeu dhe Kulla e Sahatit të Tiranës, si dhe bëri me të një shëtitje në bulevardin e Tiranës, ku kanë tërhequr edhe vëmendjen e qytetarëve të kryeqytetit. Aktorja Eliza Dushku u shpreh se turi i saj në Shqipëri do fillojë nga qyteti i Korçës, ku do të paraqitet dokumentari për promovimin e turizmit për vendin. Bashkë me Elizën, në realizimin e dokumentarit për Shqipërinë do të kontribuojnë dhe artistë të tjerë me famë botërore, si sopranoja Inva Mula, fotografi Fadil Berisha dhe aktori Blerim Destani.
Kërkesa për shtetësinë
Aktorja hollivudiane Eliza Dushku ka bërë kërkesën për t’u pajisur me pasaportë shqiptare. Fill pas zbritjes në aeroport, ajo tregoi shkresën me firmën e saj për të marrë shtetësinë shqiptare. Eliza Dushku gjendet në Shqipëri për të bërë një dokumentar mbi rrënjët e saj shqiptare me një ekip televiziv amerikan, si dhe me agjencinë “Lonely Planet”, e cila e ka renditur Shqipërinë si destinacionin numër 1 në botë.
