Kërcënimi që ambasadori amerikan Donald Lu i bëri deputetëve të Kuvendit të Shqipërisë, se do të përballeshin me pasoja në marrëdhëniet e tyre me SHBA nëse nuk votonin Reformën në Drejtësi ishte në përputhje me udhëzimet që vinin nga Uashingtoni.
Këtë e ka konfirmuar sot, në një deklaratë për mediat, zv/ndihmës sekretari amerikan, Hoyt Brian Yee.
Ai rikonfirmoi se Ambasadori Lu dhe Ambasada e SHBA nxitën udhëheqësit e partive dhe anëtarët e parlamentit, për ta mbështetur dhe votuar reformën në drejtësi.
Sipas tij, “Ambasada i diskutoi këto pasoja me partitë politike sipas udhëzimeve specifike nga Uashingtoni. Donim të ishim të qartë që të mos kishte asnjë keqkuptim më pas”.
DEKLARATA
“Së pari, përgëzoj parlamentin që e miratoi këtë reformë jetike dhe përgëzoj popullin e Shqipërisë që kërkoi ndryshim.
Ambasadori Lu dhe Ambasada e SHBA nxitën udhëheqësit e partive dhe anëtarët e parlamentit për ta mbështetur reformën në drejtësi dhe bënë të qartë se do të kishte pasoja negative në marrëdhëniet e tyre me Shtetet e Bashkuara nëse do të votonin kundër.
Ambasada i diskutoi këto pasoja me partitë politike sipas udhëzimeve specifike nga Uashingtoni.
Donim të ishim të qartë që të mos kishte asnjë keqkuptim më pas. Angazhimi ynë ka qenë gjithmonë i bazuar në kërkesën e qeverisë dhe opozitës shqiptare për mbështetjen dhe përfshirjen e SHBA.
NDIQE LIVE "PANORAMA TV" © Panorama.al
