Gjykata e Lartë vendosi sot pranimin e pjesshëm të kërkesës së avokatëve të Tom Doshit, duke ndryshuar masën e sigurisë nga “arrest shtëpie” në “detyrim paraqitje” për deputetin e Shkodrës. Gjykata nuk vendosi për të revokuar masën e sigurisë për Doshin, siç ishte kërkuar nga dy avokatët e tij, por vendosi që deputeti duhet të paraqitet çdo të hënë në orën 10:00.
Ndërkohë “Panorama Online” zbardh mbrojtjen e Doshit në Gjykatën e Lartë gjatë seancës së sotme.
Mësohet se Doshi ka deklaruar se përse tre akuzat,“kanosjes për deklarime e dëshmi, ekspertim, ose përkthim të rremë”, “kallëzimit të rremë” dhe “deklaratave të rreme përpara prokurorit”, ndaj tij nuk kanë ekzistuar.
Doshi u mbrojt duke thënë se ‘asnjëra nga akuzat nuk kanë ekzistuar ndonjëherë”.
Për akuzën “kanosjes për deklarime e dëshmi, ekspertim, ose përkthim të rremë”, Doshi u shpreh se nuk ka asnjë dëshmi që ta provojë se kjo akuzë qëndron. Sipas mbrojtjes edhe në laptopin e sekuestruar të deputetit u vertetua se nuk ka video ku ai shfaqet duke kërcënuar Durim Bamin.
Për akuzën “kallëzimit të rremë”, Doshi u mbrojt duke thënë se ai “asnjëherë nuk ka bërë kallëzim për ngjarjen”.
Kurse për akuzën “deklaratave të rreme përpara prokurorit”, deputeti tha se ka qenë “Mark Frroku i cili më ka thënë i pari”.
Pas seancës në një prononcim për mediat avokati i Doshit, Vladimir Meçi tha vendimi i gjykatës ishte i ndikuar politikisht. Ai shtoi se Doshi do të kthehet në Kuvend dhe se do të vijojë betejat gjyqësore për drejtësi.
NDIQE LIVE "PANORAMA TV" © Panorama.al