Djali i gazetarit saudit, Jamal Khashoggi i cili u vra brenda një konsullate Saudite, në Stamboll në Tetor 2018, ka bërë një deklaratë befasuese. Salah Khashoggi ka thënë se fal vrasesit e babait te tij, shkruan BBC.
Permes nje shenimi ne Twitter, djali i gazetarit shkruante se: “Në këtë natë të bekuar të muajit të bekuar [të Ramazanit] kujtojmë thënien e Zotit: Nëse një person fal dhe bën pajtimin, shpërblimi i tij i takon Allahut”, ka shkruar Salah, i cili jeton në qytetin saudit të Jeddah.
“Prandaj ne bijtë e Dëshmorit Jamal Khashoggi njoftojmë faljen e atyre që vranë babanë tonë, duke kërkuar shpërblim Zotin e Plotfuqishëm”.
Jamal Khashogg ishte një kritik i qeverisë Saudite dhe zyrtarët sauditë kishin thënë se vdekja e tij ishte rezultat i një “operacioni mashtrues” dhe nuk ishte organizuar nga shteti. Por, autoritetet më vonë ndryshuan deklarimin e tyre dhe thanë që Khashoggi ishte vrarë në një operacion të fshehtë nga një ekip që kishte shkuar ta rrëmbente atë dhe ta sillte në Arabinë Saudite.
Dhjetorin e kaluar, një gjykatë saudite dënoi me vdekje pesë persona, për rolin e tyre në vrasjen e tij. Megjithatë, një hetues i posaçëm i Kombeve të Bashkuara ka bërë thirrje për një hetim të pavarur të rastit.
