Më shumë se një muaj pas vrasjes së 40-vjeçarit shqiptar në Greqi, Pëllumb Islamit, është vetëdorëzuar një prej personave i cili ishte shpallur në kërkim.
Në pranga është vendosur shtetasi Olsian Murrizi, 33 vjeç. Ai është paraqitur sot në Policinë e Athinës teksa ka pranuar se ka qenë i përfshirë në shkëmbimin me armë zjarri që tronditi vendin në muajin e kaluar.
Në 20 mars policia greke arrestoi një tjetër 23-vjeçar shqiptar, i cili kërkohej për ngjarjen. Ata i përkasin një bande kriminale në Greqi.
Si u identifikuan?
Anëtarët e bandës shqiptare janë identifikuar nga kamerat e sigurisë, që kanë filmuar momentin kur ata mbërritën në lokal, si edhe arratisjen e tyre.
Përveç 7 personave të shpallur në kërkim, mes të cilëve 34 vjeçari nga Fieri, Elis Salaj, edhe një person tjetër mësohet se është përfshirë në përleshjen e përgjakshme por nuk është identifikuar ende.
Vrasja
Grupi shqiptar hyri në lokal dhe shkoi drejt zonës VIP. Ata biseduan me pronarin dhe kur po largoheshin u përballën me anëtarët e grupit rival që ndodheshin brenda lokalit, në tavolinën ku ndodhej Pëllumb Islami.
Sipas dëshmitarëve, fillimisht u përleshën dhe kërcënuan njëri-tjetrin në gjuhën shqipe.
Më pas, nxorën armën duke qëlluar në drejtim të grupit rival dhe për pasojë humbi jetën Pëllumb Islami.
Kthesa e hetimeve
Ndërkohë, në bazë të hetimeve, gjatë përplasjes mes bandave janë përdorur dy armë, një revole dhe një pistoletë.
Fillimisht u dyshua se 39-vjeçari u qëllua aksidentalisht, por hetuesit tani dyshojnë se ai ishte shënjestruar qëllimisht, pasi ishte anëtar i bandës rivale me të cilën kishte mosmarrëveshje Elis Salaj.
NDIQE LIVE "PANORAMA TV" © Panorama.al
