Vrasja e informatorit të policisë, si u justifikuan në gjyq babë e bir: Ne ishim …

Sep 11, 2018 | 9:50
SHPËRNDAJE

UPDATE/ BRIKENA META/ Të arrestuarit për vrasjen e Alket Muhos në fshatin Rabije të Memaliajt nuk kanë pranuar akuzën as dje në seancën ku do të jepej masa e sigurisë.

Babë e bir, Hetem dhe Dino Muho, dolën para trupit gjykues ku iu komunikua masa “arrest me burg’. “Nuk jemi ne autorët e kësaj vrasje. Kisha shkuar bashkë me djalin që të shihnim nënën time që jeton aty në fshat, pasi ne banojmë në Çukë të Sarandës. Nuk kemi asnjë lidhje me atë që ka ndodhur”, është shprehur dje para trupit gjykues 59- vjeçari Hetem Dino.

Edhe djali i tij 20-vjeçar, Dino Muho, ka mohuar të ketë lidhje me këtë krim. Burime nga grupi i hetimit bënë të ditur se një ndër provat e forta mbetet mungesa e një çifteje që Hetem Muho e kishte me leje. Por, ditën e arrestimit, ai ka deklaruar se nuk e kishte më armën pasi i kishte humbur.

Akti i ekspertimit ka konfirmuar se në trupin e viktimës ka disa plagë plumbi kallashnikovi dhe vetëm një plagë me çifte. Burime nga Prokuroria pohojnë se kanë dyshime të forta për autorësinë e dy të akuzuarve, ku përfshihen edhe kundërthëniet e tyre. Por, pa specifikuar më tej në lidhje me deklarimet që kanë dhënë babë e bir për hetimorët. Ndërkaq, këta të fundit theksojnë se nuk përjashtojnë asnjë pistë tjetër të mundshme në lidhje me krimin e rëndë, duke nënkuptuar edhe atë se 43- vjeçari mund të jetë ekzekutuar për hakmarrje, pasi ai ishte informator i Policisë për parcelat që mbilleshin me hashash.

Gjithsesi, kjo pistë nuk konfirmohet zyrtarisht nga ana e Policisë së Gjirokastrës. Dy të akuzuarit u mbrojtën dje nga një avokat kryesisht, pasi askush nga të afërmit e tyre nuk është paraqitur në Gjykatë. Tashmë, ndaj Hetem dhe Dino Muhos rëndojnë akuzat për veprat penale “Vrasje me dashje kryer ne bashkëpunim, “Prodhim e mbajtje pa leje armëve luftarake e municionit”, “Prodhim e mbajtje pa leje armëve të gjuetisë dhe sportive”.

Ngjarja ku mbeti i vrarë Alket Muho ndodhi në tokat e tij. Ai po fliste në telefon me bashkëshorten e tij, kur kjo e fundit ka dëgjuar teksa ai tha “çfarë bëni kështu more çuna?” dhe më pas dëgjoi krismat. E shoqja ka shkuar menjëherë në vendin ku ai ndodhej dhe e ka gjetur pa jetë. Janë rreth 20 plumba që kanë përshkuar trupin e tij, çka i morën edhe jetën. Ngjarja ndodhi vetëm pak ditë pasi Policia zbuloi 5 parcela të mbjella dhe arrestoi dy persona në zonën ku jetonte viktima.

Vjehrri i viktimës, shtetasi Riza Ardina, nuk e mohoi që dhëndri i tij të mos jetë implikuar me hashashin në këtë zonë. “Ai (Alketi) e ka pasur shok atë që u kap me hashash. Parvjet u zu me të se ai e akuzonte se i kishte vjedhur hashashin. Por, në fakt, ia kishte vjedhur nipi i tij dhe u sqarua kjo situatë mes tyre. Ky shoku i tij është kapur me hashash”, u shpreh vjehrri i viktimës. Megjithatë, ai këmbënguli se vrasja është kryer për shkak të konflikteve që ka pasur për pronat. Ndërsa i ati, Gjolek Muho, u shpreh një ditë pas ngjarjes se i biri nuk kishte asnjë konflikt.

9 Shtator 2018

GJIROKASTER/ BRIKENA META/ “Nuk kemi asnjë lidhje me ngjarjen”. Ka qenë kjo deklarata e babë e bir, Hetem e Dino Muho, 59 dhe 20 vjeç të arrestuar për vrasjen e 43- vjeçarit nga fshati Rabije, Alket Muho.  Ashtu siç deklaroi dy ditë më parë edhe vjehrri i viktimës, Riza Ardita, prova më e fortë që Policia kishte për të arrestuar babë e bir ishte prezenca e tyre në fshatin Rabije, ndonëse banonin në Çukë të Sarandës. Por ata kanë deklaruar se nuk kanë lidhje me ngjarjen, ndërsa prania e tyre në fshatin Rabije ka qenë e rastësishme, pasi aty kanë vendlindjen si dhe nënën e gjyshen e familjes. “Ndodheshim rastësisht në fshatin Rabije, ishim për vizitë në vendlindje. Erdhëm për të parë nënën time”, mësohet të ketë deklaruar në Polici 59- vjeçari Hetem Muho.

Viktima Alket Muho
Viktima Alket Muho

HETIMI

Gjirokastrës po punon për mbledhjen e provave në terren për të depozituar më pas dosjen në Prokurori. Uniformat blu po kërkojnë armët e krimit, njëra prej të cilave dyshohet të jetë një çifte. Kjo e vështirëson edhe më tej situatën e dy të akuzuarve pasi 59- vjeçari ka pasur një çifte me leje, për të cilën ka deklaruar në Polici vetëm një ditë më parë se i ka humbur. Fshehja e këtij fakti ka shtuar dyshimet e Policisë për implikimin e tij në vrasje, ndërsa në vendngjarje është gjetur vetëm një gëzhojë arme automatike e kalibrit 7.62 mm nga 20 plumba me të cilat është qëlluar viktima. Gjithsesi, do të jenë rezultatet balistike të mëvonshme të cilat do të saktësojnë nëse çiftja e përdorur në krim është e njëjtë me atë të regjistruar në emrin e 59-vjeçarit Muho. Prova e vetme e Policisë deri tani janë prezenca e babë e bir në fshatin ku ndodhi vrasja, por edhe deklarimet kontradiktore të autorëve të dyshuar në lidhje me vendndodhjen e tyre si dhe ato gjatë përgjimeve ambientale.

ARRESTIMI

Policia ndërhyri dhe arrestoi babë e bir, vetëm një ditë pas krimit të rëndë të ndodhur në fshatin e largët të Memaliaj. Dy të arrestuarit ishin të dyshuar jo vetëm për faktin se u gjendën në zonën afër fshatit, por edhe se ata kishin pasur konflikt të vazhdueshëm me viktimën për një çështje prone. Madje, siç mësohet, dy vite më parë, i dyshuari Muho e kishte hedhur në gjyq çështjen me kushëririn e tij të largët Alket Muho. Por për arsye ende të paqarta, vetë paditësi ishte tërhequr nga kjo çështje, e cila më pas ashtu siç e ka edhe procedura gjyqësore, është pushuar. Sipas Policisë, nga tërësia e veprimeve dyshohet se dy autorët (kushërinj të largët me viktimën) e kanë vrarë shtetasin Alket Muho për shkak të konflikteve të përsëritura me motive pronësie, në Viktima Alket Muho fshatin e origjinës së autorëve. Policia ka rënë në gjurmët e të dyshuarve që në momentet e para pas krimit. Kjo pasi nga hetimet e kryera ka rezultuar se dy familjet ishin në konflikt me njëra-tjetrën prej 5 vitesh dhe madje kohët e fundit kishte pasur disa herë përleshje mes autorëve të dyshuar dhe viktimës. Ndaj të arrestuarve rëndojnë veprat penale “Vrasje me dashje kryer në bashkëpunim, “Prodhim e mbajtje pa leje e armëve luftarake e municionit”, “Prodhim e mbajtje pa leje e armëve të gjuetisë dhe sportive”.

PANORAMA

NDIQE LIVE "PANORAMA TV" © Panorama.al

Te lidhura