Mbesa mbyt me të dashurin gjyshen 82 vjeçe për ta grabitur. E moshuara është përcjellë në banesën e fundit duke menduar për një vdekje natyrale, por krimi i rëndë është zbuluar tre muaj më vonë. Specialistët e Sektorit të Krimeve të Rënda në Policinë e Shkodrës, në bashkëpunim me Prokurorinë e Rrethit, bënë të mundur zbardhjen e krimit të rëndë të ndodhur më 22 shkurt të këtij viti, që bën fjalë për vjedhje me dhunë me pasojë vdekjen.
Sipas Policisë, të arrestuarit janë Erando Qatipi, 27 vjeç dhe Xhoana Hila (mbesa e viktimës), 32 vjeçe, që të dy banues në Tiranë. “Nga veprimet hetimore intensive nën drejtimin e Prokurorisë së Rrethit Shkodër, ka rezultuar se ata janë autorë të dyshuar të vjedhjes me dhunë me pasojë vdekjen e shtetases A. H., ndodhur më datë 25.02.2015”, bëri të ditur Policia.
NGJARJA
Sipas Prokurorisë së Shkodrës, Xhoana Hila (mbesa e viktimës) është rritur nga gjyshja (viktima) dhe ka jetuar me të deri në ditët kur ka ndodhur krimi. Mësohet se 32-vjeçarja ka qenë e martuar, por pasi është divorcuar, është kthyer të jetojë me gjyshen në banesën e saj dhe prej rreth një viti aty ka shkuar edhe Erando Qatipi, i cili është në një lidhje me 32-vjeçaren dhe bashkëjetonte me të në banesën e gjyshes së saj.
Ngjarja ndodhi më 22 shkurt, kur ata dyshohet se janë pikasur nga e moshuara teksa po i vidhnin paratë. Dyshohet se 82-vjeçarja ka reaguar kur ka parë çiftin që kishin zbuluar vendin ku ajo i kishte fshehur ato e në këtë moment ata kanë vendosur ta mbysin atë. Burime nga Policia bënë të ditur se e moshuara është mbytur me jastëk, por ndërkaq ekspertiza e kryer ka zbuluar edhe mbytje me duar.
“Në bashkëpunim me njëri-tjetrin ata i kanë vjedhur viktimës disa bizhuteri floriri, dy unaza, një orë floriri dhe një shumë të hollash (lekë)”, thuhej në njoftimin e Policisë së Shkodrës. Vdekja e 82- vjeçares A.Hila është zbuluar kur Tonini, djali i madh i saj, i cili jetonte në Shkodër, e ka telefonuar. Por kur ka parë se nëna nuk po i përgjigjej, atëherë ai është lidhur me vëllain tjetër për të mësuar nëse kishte dijeni se mos nëna është e sëmurë, pasi nuk po i përgjigjej në telefon. Ata janë shqetësuar dhe janë nisur menjëherë drejt banesës, nga ku e kanë gjetur të pajetë. Ndonëse nëna e tyre nuk kishte shenja të dukshme dhune në trup, ata kanë konstatuar rrëmujë dhe disa sirtarë të lënë hapur.
HETIMI
Pas ngjarjes së ndodhur në shkurt të këtij viti, vdekja e të moshuarës është cilësuar fillimisht nga djemtë e saj si natyrale. Djali tjetër i viktimës ka ardhur nga Italia dy ditë pas varrimit dhe, teksa qëndronte në Shkodër duke pritur njerëz që vinin për ngush- ëllim, nga bisedat në familje si dhe shpjegimet që i janë dhënë, i është krijuar dyshimi se nëna e tij nuk kishte vdekur në mënyrë natyrale. Ai madje ka dyshuar se në vdekjen e të moshuarës kishte gisht mbesa e tyre, Xhoana Hila.
Ky dyshim ka lindur edhe për shkakun se në ato ditë, ajo bashkë me të dashurin 27-vjeçar janë zhvendosur nga banesa e gjyshes në Tiranë. Ata u kanë shpjeguar të afërmve se do të largoheshin në Tiranë për mundë- si më të mira jetese dhe për të qenë më të qetë me njëri-tjetrin.
Por kjo ka ngjallur dyshime te djemtë e viktimës, e madje edhe te Tonini, djali i madh i cili është babai i 32-vjeçares. Mësohet se ai ishte i divorcuar nga e shoqja. Dyshimet e tyre kanë qenë që në momentet e para, ndaj edhe kanë sinjalizuar policinë për t’u kryer autopsia.
Ata i kanë dhënë lamtumirën e fundit nënës, duke u shpjeguar të afërmve se kishte vdekur në mënyrë natyrale. Por autopsia ka nxjerrë në pah se e moshuara kishte vdekur si pasojë e mbytjes. Xhaxhai i 32-vjeçares ka deponuar në polici se e dyshuara kryesore ishte pikërisht mbesa e tij, bashkë me të dashurin.
NDIQE LIVE "PANORAMA TV" © Panorama.al
