UPDATE/ Kryeministri i Serbisë, Aleksandër Vuçiç, nisi sot vizitën e tij dy ditore në Shqipëri. Policia e Shtetit ka njoftuar që një ditë më parë se do të angazhojë rreth 1300 policë për ruajtjen e sigurisë.
Ndërsa sipas burimeve jo zyrtare, numri i shërbimeve të angazhuara pritet të jetë më shumë se 1500 policë në terren. Shifrave të publikuara nga policia nuk i janë bashkuar edhe punonjësit e shërbimeve sekrete dhe të atyre forcave që do të jënë në gatishmëri për sigurimin e kufijve shtetëror.
Në një deklaratë për mediat pasditen e së martës, zëvendësdrejtori i Përgjithshëm i Policisë së Shtetit Altin Qato, deklaroi se janë marrë të gjitha masat për ndalim-qarkullimin e përkohshëm të automjeteve në disa akse rrugore të Qarkut Tiranë dhe Durrës.
Burimet nga Policia e Shtetitmë herët thanë se në axhendën e kryeministrit serb në Shqipëri, është parashikuar edhe një darkë në qytetin e Durrësit. Por ajo u anulua dhe mesohet se darka do te jete ne Tirane.
Deklarata e plotë e Policisë së Shtetit”
Drejtoria e Policisë së Shtetit, me strukturat në vartësi të saj, ka marrë një sërë masash për të garantuar rendin publik , sigurinë dhe mbarëvajtien e aktiviteteve që do zhvillohen me rastin e vizitës së Kryeministrit të Republikës së Serbisë në Tiranë, më datat 27 e 28 Maj 2015, si dhe për të garantuar rendin e sigurinë në tërësi gjatë dy ditëve të zhvillimit të Samitit Ekonomik të Vjenës në Tiranë.
Në këtë kuadër, do të angazhohen, Strukturat Qendrore të Drejtorisë së Përgjithshme për Sigurinë Publike, Drejtorisë së Përgjithshme për Krimin e Organizuar dhe Krimet e Rënda, Drejtorisë së Përgjithshme për Kufirin dhe Migracionin, Drejtorisë së Antiterrorit, si dhe të Forcës së Posaçme Operacionale.
Në mbështetje të Drejtorisë së Policisë së Qarkut Tiranë dhe Durrës do të angazhohen strukturat e Forcave Lëvizëse Operacionale, konkretisht nga Forcat e Ndërhyrjes së Shpejtë 160 punonjës policie, si dhe nga Forcat Speciale Renea 80 punonjës policie.
Nga Drejtoria e Policisë së Qarkut Tiranë do të angazhohen gjithsej 850 punonjës policie, nga Shqiponjat , Patrullat e Përgjithshme, SPZ, Policia Rrugore, Hetimi i Krimit, si dhe nga Operacionet Speciale.
Gjithsej vëtëm në Tiranë do të angazhohen në terren 1090 punonjës policie.
Ndërsa në teritorin e Qarkut Durrës do të angazhohen 220 punonjës policie.
Strukturat për Kufirin dhe Migracionin në nivel Qëndror dhe Rajonal kanë shtuar masat për kontrollin dhe mbikëqyrjen e kufirit shtetëror, si dhe për kontrollin e shtetasve në hyrje në të gjitha pikat e kalimit kufitar.
Gjithashtu Strukturat e Policisë së Shtetit po bashkëpunojnë dhe bashkërendojnë veprimet me Gardën e Republikës për të gjitha masat e sigurisë, me
Shërbimin Informativ Shtetëror dhe Shërbimet e tjera Inteligjente për shkëmbimin e informacionit në kohë reale, si dhe me Ministrinë e Mbrojtjes, për monitorimin me helikopter të hapësirës ajrore të qytetit të Tiranës.
Përveç këtyre masave, theksojmë se nga Strukturat e Policisë së Shtetit janë marrë masat për të garantuar rendin dhe sigurinë publike në të gjithë teritorin e vendit.
Kërkojmë mirëkuptimin dhe mbështetjen e qytetarëve dhe të medias për të gjitha masat e marra nga Policia e Shtetit , në veçanti ato për ndalim-qarkullimin e përkohshëm të automjeteve në disa akse rrugore të Qarkut Tiranë dhe Durrës, të cilat janë bërë publike gjatë paradites së sotme në komunikimet tona me median.
NDIQE LIVE "PANORAMA TV" © Panorama.al
