“Virusi logjik i tautologjisë!”- Artan Fuga për “optimistët” që flasin për koronavirusin: Të ishte Emanuel Kanti do ja jepte vetes me revole

Mar 26, 2020 | 21:09
SHPËRNDAJE

Artan Fuga

artanfugaa

Kur ra tërmeti, kishte ca që bënin profetin dhe thoshin : keni për të parë nuk do të bjerë më!

E kishin mirë! Edhe e mbyllnin me notë pozitive dhe hiqeshin si optimistë, edhe dukej sikur dinin diçka. Sikur ëngjëlli Gabriel u kishte ardhur te veshi, kishte gjetur njeriun e shenjtë, të pastër si fëmija, pa mëkate dhe ja kishte dhënë lajmin e mirë.

Qesharake!

Dhe llogaritë i kishin bërë mirë kodoshat – në kuptimin pozitiv të fjalës – sepse nëse tërmeti nuk binte atyre u dilte fjala, nëse tërmeti binte përsëri i fortë na çonte në dreq të gjithëve dhe atyre nuk kishte më kush t’u thoshte :

More kodosha – në kuptimin e mirë të fjalës – ju na thatë se nuk do të binte më !

Luanin me qarrin duke bërë shkencëtarin. Poker!

Pra, në cdo rast fjala do t’iu dilte. Vetë fjalia “Nuk ka tërmet tjetër!” pra vërtetonte veten me vetveten.

Dekarti që kërkonte fjalinë evidente nga ta niste filozofinë e së vërtetës do t’i kishte pasur zili për nder!

E njejta gjë tani! Dalin ca që në mënyrë optimiste, pozitiviste, bëjnë përsëri tautologjira dhe tallen me opinionin publik.

Ndërtojnë fjali pa kuptim, gjithmonë që dalin të vërteta sepse nuk mund të mos dalin, por pa asnjë bazë, pa asnjë studim shkencor, dhe hiqen si shkencëtarë të mëdhenj!

Pse 1 – 1 = 0 ?

Sepse 0 + 1 = 1

E kuptove, ja pse!

Dhe tani thonë : Koronavirusi do të mundet patjetër!

Si tërmeti!

Po u mund – do të thonë : E e patë? Vetë Marie Magdalena kishte folur me mua dhe më erdhi dhe ma dha lajmin e mirë! Mua, të pastrit, mua të mirit, mua shpirtdlirit, mua që kurrë nuk kam bërë mëkate, mua të dashurit me shokët dhe … me shoqet, mua zemërbardhit, mua që nuk kujtoj fare se ju jeni budallenj!

Pa studime, pa prova, pa shkencë, deklarojnë, deklarojnë, deklarojnë : Virusi do të mundet!

Po nuk u mund dhe larg qoftë na zhduk, e kush do t’u thotë : Pa hajdeni ju kodosha këtu – pse na gënyet?

Kush do t’ua thotë ? Macja e lagjes, qentë e rrugës, cakejtë e malit, arinjtë e murmë, kush?

Prandaj thonë fjalinë më idiote të mundëshme në planin logjik : Koronavirusi do të shporet! E deklarova unë për gjithë botën!

Qesharake!!!

Pse 2 + 2 = 4 ?

Sepse 4 – 2 = 2 moooooo! Ja pra!

U pika logjikës ! – thuaj!

Te ishte Emanuel Kanti t’i dëgjonte këto tautologjira do ja jepte vetes me revole : bam!

Gjykime tautologjike të nivelit më mediokër!

Por, kjo nuk i pengon të hiqen si profetë ! Virusi do të largohet, do t’a mundim!

Shikoni, shikoni, edhe betejën me virusin e shohin si një sport mundjeje, si betejë politike, si deklaratë : Virus ik!

Cfarë fatkeqësie!

A thua se e bëjnë të na japin optimizëm. Se na dinë spurdhjakë! Frikën e tyre na e japin ne!

Virusi sigurisht do të mundet!

NDIQE LIVE "PANORAMA TV" © Panorama.al

Te lidhura