Tiranë- Dy persona janë arrestuar mëngjesin e të dielës nga Policia Rrugore pasi tentuan të korruptojnë efektivët pasi janë kapur në shkelje. Rreth orës 05:30 në zonën tek kryqëzimi i “Vasil Shantos”, policia ndaloi automjetin “Nissan”, shoferi i të cilit, shtetasi Donald N. 22 vjeç, rezultoi në test se ishte nën ndikimin e alkoolit. Por në momentin që efektivët i kanë kërkaur dokumentacionin përkatës dhe i komunikuan se do të shoqërohej në Drejtorinë e Policisë për verifikime të mëtejshme, 22-vjeçari ka tentuar që të korruptojë punonjësin e policisë, siç duket edhe në videon e siguruar nga “News24”, duke i dhënë një shumë parash prej 3000 lekësh të rinj, duke i kërkuar punonjësit të Policisë që ta lejonte të largohet.
Efektivi i policisë rrugore e ka shoqëruar 22-vjeçarin, si autor i dyshuar për veprën penale të “Korrupsioni aktiv i personave që ushtrojnë funksione publike.
Ndërkohë pranë Urës së Tajvanit, në Bulevardin “Bajram Curri”, policia ka konstatuar duke qarkulluar në sens të kundërt automjeti tip Golf4 drejtuar nga Tedian Z. 20 vjeç, për të cilin gjithashtu u dyshua se kishte konsumuar dhe alkool. Kur i është kërkuar të shoqërohej në komisariat edhe 20vjeçari ka tentuar të korruptojë punonjësin e policisë, duke i dhënë një kartëmonedhë 500 lekëshe. Edhe ky shtetas është shoqëruar në ambientet e Drejtorisë së Policisë Tiranë, me akuzën për kryerjen e veprimeve të mëtejshme, si autor i dyshuar për veprën penale të “Korrupsioni aktiv i personave që ushtrojnë funksione publike”.
NDIQE LIVE "PANORAMA TV" © Panorama.al