VIDEO/ Lot e trishtim tek kolegët, mbërrin nga Italia trupi i pajetë i Paulin Prekës. Mjeshtri i madh i humorit do prehet në vendlindje

Sep 8, 2021 | 11:57
SHPËRNDAJE

Trupi i pajetë i Mjeshtrit të Madh të humorit shkodran dhe mbarë shqiptar, Paulin Preka mbërriti paraditen e 8 shtatorit nga Italia në qytetin e tij të lindjes në Shkodër.

Teatri i qytetit, “Migjeni”, ka hapur dyert për të zhvilluar homazhet e fundit për nder të artistit të madh shqiptar, i cili u nda nga jeta më 4 shtator.

 

Kolosi i humorit shqiptar mbylli sytë përgjithmonë në Itali, ku jetonte prej vitesh me familjen e tij.

Të afërm, kolegë dhe miq të tij, kanë qenë të pranishëm në momentet kur arkëmorti ka mbërritur në ambientet e Teatrit Migjeni ku do të zhvillohen edhe homazhet.

Zyliha Miloti dhe emra të tjerë të mëdhenj të humorit, kolegë të Paulin Prekës janë parë të përloten për këtë humbje të madhe për qytetin e Shkodrës dhe Shqipërinë.

Paulin Preka do të prehet në qytetin e tij të lindjes.

***

Preka u lind në Shkodër më 2.02.1935 në një familje të varfër. Në moshën 8-vjeçare, fare i vogël, u bë pjesëmarrës në shoqërinë artistike të Kishës Katedrale të qytetit të Shkodrës, e cila aktivizoi fëmijë dhe të rinj, jo vetëm në aktivitetet fetare, por edhe në aktivitete kulturore dhe edukative, ku tematikat i afronin këta fëmijë me kryeveprat e letërsisë botërore të interpretuara në skenat e vogla të qytetit të Shkodrës.

Pikërisht në këtë kohë dhe në këtë moshë, daton edhe interpretimi i parë i Paulin Prekës, i cili në melodramën “Shtatë Xhuxhmaxhuxhat”, interpretoi rolin e tij të parë “Knapsi”. Melodrama u pëlqye së tepërmi nga publiku artdashës shkodran dhe bashkë me bashkëmoshatarin Çesk Jubani u vlerësuan me çmim të parë.

Ky djalë simpatik, i shkathët dhe i zgjuar, e mbi të gjitha i talentuar do të bënte që rreth viteve 1945-1946 në moshën 11-vjeçare, mësuesi Lec Sekuj ta sillte në skenë me dramën “Djemtë e Rrugës Pal” të shkrimtarit hungarez Ferenz Molnar e cila u interpretua nga nxënësit e shkollës “Pashko Vasa”. Në këtë dramë Paulini interpretoi një ndër rolet kryesore.

Viti 1957 e në vazhdim ishin mjaft të ngarkuar me aktivitete dhe ai edhe pse punonte marangoz në kooperativën e punim drurit, pasditeve aktivizohei në Shtëpinë e Kulturës nën drejtimin e të mirënjohurit Andrea Skanjeti.

Për rreth 9 vjet që punoi si aktor drame, Paulin Preka interpretoi në disa role kryesore, ndër të cilët mund të veçojmë dramatizimin e romanit “Këneta”, përgatitur dhe vënë në skenë nga regjisori Esat Oktrova, ku Paulini u shqua në këtë shfaqje.

Pas viteve 1990 janë një sërë premierash të shkruara si librete të vëna në skenë, si ajo e të shtundeve gazmore në RTSH në vitin 1994, ku spikasin materialet e “Ndihmave humane”, “Liçensa”,, “Dasme e Refikut” e mandej në këto vite materiale që kanë mbetur në kujtesën e spektatorëve si “Krapi”, “Kena harru babën”, “Urgjenca”, “Pikniku 1977 e 1997”, materiale në vargje si “Eksodi”, hapja e recitalit të Sandër Ruçit “Çka t’tha” e shumë e shumë të tjera, si “Operacioni i dajës”, “Udhëtim me mikrobuz” etj.

NDIQE LIVE "PANORAMA TV" © Panorama.al

Te lidhura