Një gol i shënuar nga Robert Levandovski në pjesën e parë të sfidës i ka mjaftuar Barcelonës që të sigurojë një fitore minimale ndaj Majorkës dhe përkohësisht të ngjitet në kreun e renditjes në La Liga.
Skuadra katalanase dominoi fillimin e sfidës dhe ia doli të shënonte me Levandovskin, gjithmonë e më vendimtar me lojën e tij për skuadrën e Çavit që më pas administroi me qetësi dhe mbajti larg portës të rrezikshmin Muriqi.
Mbajtja e vazhdueshme e topit dhe thumbimet e herëpashershme bënë që Barcelona të luante qetësisht pjesën e dytë duke administruar forcat pasi mendoi më shumë për Europën. Por edhe rezultati 1-0 i mjafton Çavit, pasi ekipi i tij me këtë fitore u ngjit në renditje në krye, një pikë sipër Realit, i cili luan nesër.
Për më tepër, katalanasit çuan në 19 serinë mbresëlënëse të ndeshjeve radhazi jashtë fushe pa pësuar humbje në La Liga, të gjitha nën drejtimin e Çavit. Rekordi i kampionatit mbahet nga Barcelona e Pep Guardiolës në vitet 2010-2011, kur regjistroi 23 ndeshje të tilla radhazi.
PANORAMASPORT.AL
NDIQE LIVE "PANORAMA TV" © Panorama.al
