Ka ndërruar jetë në moshën 85 vjeçare aktorja e njohur kosovare, Leze Qena.
Presidenti i Kosovës, Hashim Thaçi ka shkruar në Facebook se me pikëllim e kishte marrë lajmin për vdekjen e artistes së njohur Leze Qena.
“Leze Qena na ka bërë të qeshemi, të qajmë, të duam teatrin e televizionin, të duam artin e jetën, me dekada të tëra. Lezja do t’i mungojë skenës, televizionit, tërë Kosovës. Ngushëllimet më të thella familjes dhe kolegëve të saj”, ka shkruar Thaçi.
Ndërkaq nga Qendra Klinike Universitare e Kosovës, zëdhënësi Shpend Fazliu, kanë konfirmuar për Radion Evropa e Lirë se Leze Qena, ka qenë në mjekim intensiv në këtë qendër nga data 6 mars, dhe se ajo ka vdekur më 25 mars rreth orës 9 të mëngjesit.
Leze QENA kishte lindur më 1 mars 1935, në Prizren. Vinte nga një familje mesatare. Shkollën fillore dhe të mesme e kreu në vendlindje, për të vazhduar më pas në Prishtinë. Për më shumë se 55 vjet ka qenë e pranishme në shumë shfaqje teatrale në Kosovë.
Filmografia: “Po e zëmë, po e zëmë” (mini TV seri, 1970), “Ditari i Lec Pazhecit” (mini TV seri, 1975), “I ikuri” (seri për fëmijë, 1980), “Shkolla e fshatit (TV, 1987), “Qesh e ngjesh” (TV, 1982), “Të gjithë me ne” (mini TV seri, 2000), “Familja moderne”.
REL
NDIQE LIVE "PANORAMA TV" © Panorama.al
