Vdekja e ish-deputetit hero të Greqisë/ Meta: Shqiptarët humbën një mik të çmuar. Kurrë s’duhet ta harrojmë porosinë e tij “mos i hidhni verës ujë”

Mar 30, 2020 | 16:43
SHPËRNDAJE

Presidenti Ilir Meta ka reaguar për lajmin e ndarjes nga jeta sot të ish-deputetit grek Manolis Glezos.

metaaa

Sipas kreut të shtetit, “ai nuk ju nda deri në fund të jetës të gjitha betejave për demokraci dhe drejtësi shoqërore duke qëndruar përherë në anën e duhur të historisë. Manolis Glezos ndërroi shumë parti, por kurrë kauzat e lirisë, demokracisë dhe drejtësisë sociale“.

Ish-deputeti grek, njihet për qëndrimet e tij pro Shqipërisë dhe në përkrahje të emigranteve, ndërkohë që disa vite më parë ka mbajtur një fjalim të fortë në parlamentin helen, ku ka thënë se 13 deputetë kishin prejardhje shqiptare, duke qenë arvanitas.

POSTIM I PLOTE I PRESIDENTIT META

Sot u nda nga jeta Heroi i Rezistencës Antifashiste të Greqisë, Manolis Glezos i cili në moshën 18-vjeçare guxoi të hiqte nga Akropolis flamurin nazist me svastika duke paralajmëruar rezistencën heroike të popullit grek.
E gjithë jeta e Tij ishte përkushtim dhe sakrificë për popullin e tij kundër pushtuesve dhe kundër diktaturave. Pavarësisht vuajtjeve në burgjet e fashizmit dhe të juntës, Manolis Glezos kurrë nuk e humbi besimin te liria, demokracia dhe populli i Tij.

Ai nuk ju nda deri në fund të jetës të gjitha betejave për demokraci dhe drejtësi shoqërore duke qëndruar përherë në anën e duhur të historisë.
Manolis Glezos ndërroi shumë parti, por kurrë kauzat e lirisë, demokracisë dhe drejtësisë sociale.

Populli grek humbi sot një ikonë të shpirtit të Tij liridashës, ndërsa ne shqiptarët humbëm sot një mik shumë të çmuar të popullit tonë dhe një përkrahës të palëkundur të fqinjësisë së mirë midis dy vendeve dhe dy popujve tanë.
Ne do ta kujtojmë dhe duartrokasim gjithmonë veprën e Manolis Glezos njësoj si eurodeputetët fjalën e Tij të fundit për Europën 6 vjet me parë.
Kurrë nuk duhet ta harrojmë porosinë e tij: Mos i hidhni verës ujë! Fashizmi nuk ka vdekur!
I përjetshëm kujtimi i Tij!

NDIQE LIVE "PANORAMA TV" © Panorama.al

Te lidhura