Kufiri
Ditën e djeshme në Kakavijë, fluksi i të ardhurve ka qenë normal, ndërkohë që ditët në vazhdim pritet shtimi i lëvizjeve. Të ardhurit nga Greqia ditën e djeshme kanë përshëndetur për gazetën “Panorama” marrëveshjen mes dy vendeve. Shumë prej shtetasve shqiptarë që kalonin në kufi, kanë qenë edhe skeptikë për vërtetësinë dhe zbatimin e kësaj marrëveshjeje nisur nga problemet e shumta e të vazhdueshme në të shkuarën. Çështja e toponimeve është shndërruar në një problem të madh për emigrantët shqiptarë e sidomos të atyre që kanë fëmijë të lindur në Greqi. Në muajin janar të këtij viti, autoritetet kufitare greke filluan aplikimin e ndëshkimit kolektiv të gjithë atyre emigrantëve në pasaportat e të cilëve ishte shkruar vendlindja në Greqi në gjuhën shqipe. Policët grekë nuk kanë lejuar lëvizjen e shtetasve shqiptarë duke i bllokuar në kufi. Problematika alarmoi autoritetet shqiptare, të cilat disa herë kanë tentuar të gjejnë zgjidhje.
Zbatimi
Mësohet se marrëveshja e nënshkruar dje në Janinë do të zbatohet vetëm për tri pikat kufitare në qarkun e Gjirokastrës, Kakavijë, Tri Urat dhe Sopiku. Pjesë e marrëveshjes kanë qenë edhe dy pika të tjera, ajo e menaxhimit të kufijve në ditën e zgjedhjeve dhe e operacioneve të përbashkëta për goditjen e trafiqeve të ndryshme. Kreu i Policisë kufitare, Admir Abrija, për gazetën “Panorama” shprehet se pala greke ka rënë dakord që në tri ditët e fundjavës së ardhshme që përkon me procesin zgjedhor, autoritetet policore në Kakavijë të shtojnë kapacitetin e sporteleve nga 4 në 8, ndërsa autoritetet shqiptare do të vendosin në kapacitet të plotë të 13 sportelet. Në lidhje me kryerjen e operacioneve të përbashkëta kundër trafiqeve, është rënë dakord për koordinimin e veprimeve mes palës shqiptare dhe greke.
Piro Nase/ Gjirokastër
NDIQE LIVE "PANORAMA TV" © Panorama.al
