Të vdesësh në konferencë shkencore si prof. dr. Molnar Kolaneci!

SHPËRNDAJE

 

HALIL RAMA halil rama

Një ikje jo e zakontë ajo e prof. dr. Molnar Kolanecit. Ai u nda nga jeta në vigjilje të konferencës shkencore “110 Vjet Kongresi i Dibrës – Ngjarje Historike për Kombin Shqiptar”, që u mbajt para pak ditësh nga Shoqata Bashkësia Dibrane në Tiranë, në sallën e konferencave të Akademisë së Shkencave. U shua krejt papritur, ndërsa ishte i ftuar të asistonte në këtë event historik.

Iku mes emocionesh, duke pasur në krah mikun dhe bashkëpunëtorin e tij shkencor, z.Tofik Jegeni, ndonëse iu dha ndihma e menjëhershme parësore, mjekësore nga kryetari i Komunës së Dibrës së Madhe, dr. Hekuran Duka dhe me mbështetjen humane të menjëhershme të mjekut të njohur prof. dr. Petrit Barës.

Kësisoj, ndërprerja e funksionit normal qelizor të trupit të akademikut të mirënjohur në një ditë historike, e veshi atë me pavdekësi.

Para dy vjetësh, më 2017, ai u dekorua nga Presidenti i Republikës me titullin “Mjeshtër i Madh” pas mbrojtjes me teza shkencore dhe argumente hidroteknike dhe juridike, të mosdevijimit të lumit Radika.

Vetëm para disa ditësh, me vendim unanim të Këshillit të Komunës Dibër e Madhe, Republika e Maqedonisë së Veriut, shpallet “Qytetar Nderi” për mbrojtjen shkencore të lumit Radika.

EKSPERTI ME KONTRIBUT TË VEÇANTË NË PROJEKTE TË RËNDËSISHME

Eksperti i mirënjohur Molnar Kolaneci, që gjithkund e në çdo kohë rrezatonte dhe përçonte mirësi, mençuri dhe intelektualizëm të veçantë, ka lindur në Tiranë më 22.06.1948. Studimet e shkollës së mesme i ka mbaruar në vitin 1965 në gjimnazin “Petro Nini Luarasi”. Në periudhën 1966 deri në 1971 kryen studimet e larta në Universitetin e Tiranës, Fakulteti i Shkencave të Natyrës dega Fizike (5-vjeçare).

Në vitin 1972 fillon punë në Institutin Hidrometeorologjik të Akademisë së Shkencave. Objekti i aktivitetit kryesor ka qenë studimi i ujërave të Shqipërisë. Mbas një kualifikimi dy-tre vjeçar në Fakultetin e Inxhinierisë së Ndërtimit dhe në Institut ka kryer dhe dy specializime jashtë vendit, në Francë dhe Zvicër. Në Zvicër kryen një specializim pasuniversitar prej një viti, në fund të të cilit fiton gradën shkencore “Master i Shkencave” (1980). Në vitin 1983 bëhet “Doktor i Shkencave”, gjithmonë pranë Institutit Hidrometeorologjik dhe në vitin 2004 fiton gradën “Profesor Doktor”. Gjatë kësaj periudhe ka marrë pjesë në studime të ndryshme të objekteve ujore (lumenj, liqene dhe dete). Ndërkohë, është bashkautor i monografisë “Hidrologjia e Shqipërisë” dhe shumë studimeve me karakter aplikativ. Gjithashtu, si njohës i gjuhëve anglisht, frëngjisht, italisht dhe rusisht, ka marrë pjesë në projekte të ndryshme ndërkombëtare, si në rajonin e Ballkanit dhe më gjerë, si edhe në mjaft simpoziume e konferenca kombëtare dhe ndërkombëtare. Së fundi ka dhënë një kontribut të rëndësishëm në projektet për ndërtimin e rrugëve në vend dhe për ndërtimin e hidrocentraleve të vegjël.

LIDHJA E MOLIT ME KOMUNITETIN DIBRAN E ATË AKADEMIK

Të thuash i pari të vërtetën “duhet fisnikëri dhe guxim”. I tillë ishte Moli Molnari u lidh mjaft me qytetin e Dibrës së Madhe, e sidomos kur gurgule u bë situata mbi ujërat e Radikës, ku pala maqedonase pa marrëveshje donte të aneksonte rreth 4.7 m/3 ujë në sek. Kjo situatë vuri në lëvizje komunitetin dibran në Tiranë, në Dibër të Madhe e Peshkopi, ku përmes Shoqatës “Bashkësia Dibrane” të Tiranës u organizuan disa herë protesta në qendër e rrethe, kundër kësaj shkeljeje antiligjore dhe të padakordësuar me ekspertë.

Moli ankohej shpesh, pasi ishte anëtar i komisionit ndërkufitar për ujërat me pjesën maqedonase dhe greke dhe kishte rreth 4 vite që ky komision me ekspertë nuk mblidhej. Radika e vuri në lëvizje mbi situatën, por ai kërkonte të dhëna statistikore, të cilat më në fund i gjeti në Institutin Sinoptik Meteorologjik të Serbisë. Kjo situatë e gëzoi pamasë për të mbledhur fakte të tjera mbi Radikën. Radikën e rifituan si kauzë, pasi u bë sebep studimi i tre ekspertëve dhe mosdakordësia e Bankës Botërore për të investuar, që marrja e ujërave të mos vazhdonte më. U formua një grup pune, i cili pati takime me kreun e Bashkisë Dibër e Madhe, dr. Argëtim Fida, më pas me të ndjerin Ruzhdi Lata dhe me kryetarin aktual, dr. Hekuran Duka, si dhe me kryetarin e Këshillit Komunal, z. Bashkim Mashkulli. U takuan disa herë duke folur me harta në duar mbi ujërat e Radikës dhe rrezikun e shterimit të tyre në vazhdimësi.

Tofik Jegeni, Molnar Kolaneci dhe kolegu i tyre, juristi Saimir Shatku, – Mjeshtër i Madh,- bënë një studim shkencor me këndvështrim shkencor dhe juridik mbi aneksimin e ujërave. Moli u lidh mjaft me këtë situatë. Pastaj, të tre bashkautorët hartuan dhe botuan librin me titull “Dibra e Madhe dhe Radika”, të cilin e promovuan në bashkëpunim me Akademinë e Shkencave të Shqipërisë në dhjetor të 2016-ës dhe me shoqatën “Bashkësia Dibrane”.

Nga i gjithë komuniteti dibran në Tiranë e Dibër të Madhe, Moli konsiderohej si shok, si vëlla e mik. Sidomos nga bashkëpunëtorët e tij, profesorë, akademikë e pedagogë, me të cilët kaluan së bashku vite pune shumë të vështira, por dhe të mira. Sepse qenë një gjeneratë që patën fatin e atij heroit të lashtësisë, i cili vdes porsa arrin i pari maratonën. Dhe në të vërtetë, ai ia arriti i pari….Kryetari i Bashkisë Dibër e Madhe, dr. Hekuran Duka, dhe prof. dr. Petrit Bara i dhanë ndihën e parë mjekësore, por fati qe i shkruar që ai të mos jetë më fizikisht me ne. Zemra e shkencëtarit të mirënjohur pushoi së rrahuri ditën e konferencës historike shkencore për kontributin e personaliteteve dibrane në shtetformimin e kombit shqiptar, në gjurmët e të cilëve eci edhe ai për vite e dekada. Ai iku duke lënë një trashëgimi të vyer shkencore për studiuesit e sotëm dhe për brezat e ardhshëm. Pikërisht edhe për këtë fakt, për pjesëmarrësit në këtë event të rëndësishëm, si edhe për gjithë komunitetin dibran e atë akademik, ai mbetet si legjendë e gjallë e shkencave hidroteknike e meteorologjik. Si i tillë, prof. dr. Molnar Kolaneci u përcoll për në botën e përtejme me të gjitha nderimet që i meritonte.

Te lidhura


Për t’u bërë pjesë e grupit të "Panorama" mjafton të klikoni: Join Group dhe kërkesa do t’ju aprovohet.
KOMUNITETI PANORAMA ONLINE: https://facebook.com/groups/panoramaonline/

S'KA KOMENTE

Comments are closed.