Të bësh apo të zhbësh

SHPËRNDAJE

LEONIDHA MËRTIRIleonidha mertiri

Në një shkrim timin të mbi dy vjetëve më parë, botuar në po këtë gazetë, me titull “Drojë apo kurajo”, në prag të miratimit nga Kuvendi i Kosovës të Ligjit për krijimin e Gjykatës Speciale, nënvizoja një fakt të rëndë- sishëm: Krijimi i kësaj Gjykate nuk mund të shihej si fyerje për Kosovën dhe shqiptarët, aq më keq si të atillë, që mund të errësonte luftën e lavdishme të çlirimtarëve. Përkundrazi ajo duhej vlerësuar si shprehje tjetër kurajoje, për t’i parë të vërtetat në sy, pa asnjë lloj paragjykimi dhe, sikurse u shpreh atë kohë kreu i diplomacisë gjermane, si e tillë, që i bënte favor historisë së Kosovës dhe gjeneratave të reja të saj.

Në qershor të vitit 2015, Parlamenti i Kosovës nuk mundi t’i realizonte ndryshimet kushtetuese, që do t’i hapnin rrugë krijimit të Gjykatës Speciale për krime lufte, duke mos i arritur dy të tretat e votave të deputetëve. Këto oscilacione vazhduan sërish, derisa ajo do të miratohej më 3 gusht të po atij viti, me votat e deputetëve të Partisë Demokratike (PDK), Lidhjes Demokratike (LDK) dhe Listës Serbe.

Çuditërisht, sot jemi përballë një situate tjetër. Sikur të mos ishte vendosur asgjë më parë, liderët e Kosovës filluan të këmbëngulin për të mos marrë në konsideratë Ligjin për Gjykatën Speciale. Pra, të zhbësh atë që pas luhatjesh të shumta, e ke bërë më parë. A nuk ishin ata që e miratuan atë para dy vjet e gjysmë? Pendesë që hedh dritë në mungesën e seriozitetit. Të pendohesh apo të tërhiqesh nga ajo që ke vendosur, do të thotë të hedhësh pas krahëve detyrimet ndërkombëtare si Kosovë. Apo, siç thuhet me të drejtë në deklaratën e këtyre ditëve të Institutit të Kosovës për Drejtësi, të kontestohet rëndë subjektiviteti juridiko-ndërkombëtar i shtetit të Kosovës.

Kjo nuk mund të mos revoltonte partnerët tanë ndërkombëtarë më të besueshëm, në radhë të parë vendet e QUINT-it: Shtetet e Bashkuara të Amerikës, Gjermaninë, Britaninë e Madhe, Francën dhe Italinë. Në këtë mënyrë, vihet në pikëpyetje për ta përkushtimi i Kosovës për drejtësi dhe sundim të ligjit dhe ku interesat e individëve të veçantë vihen mbi ato të popullsisë. Shqetësimi i ambasadave të këtyre vendeve, akredituar në Prishtinë si dhe i qendrave të tyre, lidhet pikërisht me këto përpjekje për shfuqizimin e Ligjit mbi Dhomat e Posaçme dhe Zyrën e Prokurorit të Specializuar, pra, me Gjykatën Speciale. Prania sot, e të Dërguarit të Posaçëm për Europën Juglindore, Turqinë dhe shtetet e EFTA-s në Ministrinë e Punëve të Jashtme të Gjermanisë, Christian Hellbach, e Shefit të Departamentit të Ballkanit Perëndimor të Ministrisë së Jashtme të Francës, Thomas Bertin, shpreh të njëjtin shqetësim, por edhe përkujdesjen e njohur për Kosovën.

Përse kjo papërgjegjshmëri e udhëheqësve të Kosovës? Çfarë i shqetëson realisht ata? Nëse dikush prej tyre është marrë me prapë- sina dhe dyshohet të ketë bërë dhe krime, le të japë llogari para drejtësisë, pavarësisht kolltukut ku mund të jetë ulur e drejton sot përmes mitit të heronjve. Heronjtë janë heronj. Askush nuk mund t’i sfumojë sakrificat e mëdha të tyre. Ata kanë dhe duhet të kenë gjithë respektin dhe mirënjohjen e brezave për çka bënë me të vërtetë. Por, çdo spekulim pastaj, në emër të heroit, që iu gëzohet posteve të pamerituara, duke bërë ligjin e pasurimit të vetes, të të afërmve, madje, duke shkelur mbi njerëzit e thjeshtë apo qoftë mbi kundërshtarët politikë, nuk ka si të mos shkaktojë revoltë dhe deziluzionim të madh. Për këtë luftuan ata dhe shokët e tyre, ata që për lirinë e Kosovës nuk kursyen as jetën e tyre fare të re? E dhimbshme, por është një realitet i prekshëm pasurimi aq i shpejtë i disave, kapardisur në vila marramendëse.

Hashim Thaçi e justifikon qëndrimin pro të mëparshëm për krijimin e Gjykatës Speciale, me rrethanat imponuese nga partnerët ndërkombëtarë, që kërkonin të kënaqnin dhe aktorë si Rusia dhe Beogradi dhe që ky problem të mos përfshihej në axhendën e Këshillit të Sigurimit të Kombeve të Bashkuara. Dhe më tej, ai e shikon këtë Gjykatë si “lojalitet të Kosovës ndaj propozuesve se sa si të nevojshëm dhe si bindje se diçka e tillë duhet të ndodhë”. Përpjekjet, nga kushdo që vinë, për të shfuqizuar a rinegocuar ligjin, për të cilin u ndalëm, nuk mund të jenë në interes të vendit. Askush nuk mund ta shohë Kosovën si parcelën e vetë e për ta mbajtur peng të tyre. Shqetësimi, i lidhur tërësisht me interesat e njërit e të tjetrit nuk mund të bëhet gjithashtu motoja për t’iu kundërvënë partnerëve strategjikë të Kosovës, duke cenuar raportet me ta, Shtetet e Bashkuara të Amerikës dhe vendet e Bashkimit Europian, roli vendimtar i të cilëve është i njohur në momentet më të vështira të saj. Ndërhyrja me të drejtë e tyre dhe në këtë rast nuk cenon aspak sovranitetin e Kosovës, sikurse dëshiron ta interpretojë dikush. Përkundrazi. Është një afirmim i mëtejshëm i këtij sovraniteti.

Te lidhura

 

S'KA KOMENTE

Comments are closed.