Strehimi i afganëve/ Kryeministri Rama: Është kod nderi që na detyron të jemi mikpritës! Me krizën kosovare ishim…

Aug 24, 2021 | 9:08
SHPËRNDAJE

Kryeministri Rama vijoi edhe dje të flasë për mediat e huaja në lidhje me pritjen e refugjatëve afganë.

Duke folur për median italiane “Spray news”, kreu i qeverisë shqiptare ka deklaruar se është një kod nderi që na obligon të jemi mikpritës.

rama-talebane

Kryeministri Rama, vendi juaj është gati të presë mijëra refugjatë afganë që ikin nga talebanët. Europa, dhe gjithashtu Italia, nga ana tjetër, më duket se ende hezitojnë…

Kur është fjala për Italinë, për fat të keq jam i njëanshëm. Unë gjithashtu ndihem italian dhe për këtë arsye nuk jam në pozicionin e dikujt që mund të gjykojë, edhe sepse, si një vëzhgues i zjarrtë, siç jam, i politikës italiane, e kuptoj kompleksitetin e problemit. Unë mund të flas për vendin tim. Për ne, mirëpritja e refugjatëve afganë është një gjë shumë e rëndësishme, e natyrshme dhe morale. Tridhjetë vjet më parë ne ishim afganët që kërkuam mikpritje nga ana tjetër e detit. Ne, që në atë kohë dukej se ishim të huaj për popullin italian dhe opinionin publik europian, siç duken sot afganët. Nga ana tjetër, ne kemi një traditë për të nderuar. Shqipëria është i vetmi vend europian që priti hebrenjtë para dhe pas përfundimit të Luftës së Dytë Botërore. Është një kod nderi që na obligon të jemi mikpritës. Një kod, sipas të cilit shtëpia e secilit shqiptar i përket Zotit dhe mysafirit. Unë besoj se ne duhet të vazhdojmë ta bëjmë këtë edhe për fëmijët tanë. Ata gjithashtu duhet të kultivojnë, si një pasuri të çmuar, këtë ndjenjë përgjegjësie ndaj të tjerëve në vështirësi, duke qenë fëmijë të një populli, i cili, në momente të ndryshme të historisë së tij, është mbështetur në mikpritjen e të tjerëve.

Shqipëria, e cila ka vendosur të presë mijëra refugjatë afganë, është një vend i vogël me probleme ekonomike, supozoj, i përkeqësuar nga shfaqja e një pandemie të egër. Nuk mund të mos theksoj se mijëra refugjatët tuaj janë të barabartë, nëse krahasohen me Italinë, me të paktën gjysmë milioni njerëz…

E shihni, unë mendoj se rruga që lidh gjendjen ekonomike dhe financiare të një vendi me fatin e atyre midis jetës dhe vdekjes nuk është e drejtë, nëse mund të bëni diçka dhe t’u jepni atyre një shans për të jetuar dhe mos i lini në duar e vdekjes. Ju thoni se, nëse krijoni një marrëdhënie automatike midis atyre që na presin dhe atyre që duhet të presin Italinë, rezultati do t’ju japë gjysmë milioni njerëz. Është pikërisht i njëjti numër me vëllezërit tanë nga Kosova, të cilët në vitin 1999 arritën t’i shpëtojnë spastrimit etnik të Sllobodan Millosheviçit, duke gjetur mikpritje dhe strehim në Shqipëri.

Nga pikëpamja ekonomike, ne ishim pa dyshim në kushte shumë më të këqija se sot, të cilat sigurisht që janë të vështira, por as të krahasueshme me ato të asaj kohe. Megjithatë, ne nuk jemi zhdukur nga faqja e dheut. Ne nuk kemi vuajtur pasojat, që tani thuhet se një vend mund të vuajë nëse mirëpret dhjetëra apo edhe qindra mijëra refugjatë. Në të vërtetë, ne jemi bërë, sipas mendimit tim, më të pasur moralisht dhe më të fortë mendërisht. Dhe, atëherë, numrat tregojnë se veçanërisht vendet më të zhvilluara kanë nevojë për një fuqi punëtore që mund të sigurohet vetëm nga ata që vijnë nga jashtë kufijve të tyre, sepse brezat e rinj nuk janë të prirur të pranojnë asnjë lloj pune. Ne do të mirëpresim refugjatët afganë, pavarësisht sepse, siç ju thashë, shqiptarët mbajnë kujtesën e historisë së tyre.

Një histori që ka shkruar faqe të jashtëzakonshme të mirëseardhjes të dhëna dhe të marra. Një histori që ne nuk mund ta tradhtojmë. Sigurimi i një strehe të sigurt për ata që ikin nga vdekja e talebanëve është për ne një detyrë që tejkalon të gjithë të tjerët.

© Panorama.al

Te lidhura