Tre gola të shënuar dhe asnjë të pësuar. Interi rikthehet te fitorja në mënyrën më të mirë të mundshme, duke mposhtur në “Bentegodi” Hellas Veronën e “ish”-it Mandorlini. Skuadra e Mançinit u tregua cinike dhe mjaft inteligjente, pasi goditi kundërshtarët me kundërsulme të shpejta. Ndërsa jo më pak habiti trajneri me zgjedhjet e bëra. Kësaj here, për të “inspiruar” dy sulmuesit (Ikardin dhe Palasion), Manço aktivizoi Hernanesin duke ulur në pankinë si Shaqirin dhe Kovaçiçin.

Gol dhe protesta – Pas dhjetë minutash “prezantim”, formalizmat u zhdukën. Mjaftoi një zbritje e D’Ambrozios për të ndezur gjithçka. Taksidis, në tentativë për të frenuar italianin, humbi ekuilibrin dhe u rrë- zua, duke pësuar dëmtim në kofshë. Në atë çast, mbrojtja veroneze mendoi se rivalët do të nxirrnin topin jashtë, por ndodhi e kundërta. Topi i kaloi Palasios, i cili e futi në qendër aty ku Ikardi e kishte lojë fëmijësh për të shtyrë në portë. “Bentegodi” oshtin nga vërshëllimat, pasi publiku kontestonte zikaltrit për mungesë “fair play”. Ndërsa Mandorlinin në pankinë nuk e zinte vendi (nuk kuptohej nëse e kishte me zikaltrit, apo me të tijtë, të cilët u treguan shumë naivë).

Të pezulluar – Fraksioni i parë i ndeshjes ishte mjaft i vështirë për zikaltrit, pasi nga njëra anë ishin në rrugën e drejtë për të marrë të tria pikët, ndërsa nga ana tjetër humbën lojtarë të rëndësishëm për derbin e javës që vjen. Kështu, Brozoviç, pasi rrezikoi që të shënonte gol, mori një karton të verdhë që e “përjashtoi” nga dueli me Milanin. Të njëjtin fat pati edhe Gruarin, i cili ashtu si kroati rrezikonte të mos sfidonte “djallin” nëse “zverdhej”.

Prezent – Fillimi i pjesës së dytë ishte pozitiv për zikaltrit, të cilët siguruan fitoren pas një aksioni model. Guarin rikuperoi topin për t’ia pasuar Ikardit, i cili pa u menduar e fut në zonë aty ku ndodhej Palasio që nuk fal dhe dërgon miqtë në avantazh të dyfishtë, 2-0. Prej atij episodi, Hellas Verona nxori “kokën” në sipërfaqe dhe nisi të sulmonte me vendosmëri. Obadit dhe Morasit iu mohua goli nga “Handa”. Ndërsa Interi ishte i pafat, pasi një tjetër zbritje e D’Ambrozios i dha mundësi Palasios të godiste, por kësaj here argjentinasi u ndal nga shtylla. Mandorlini vendosi të aktivizojë Grekon dhe Saviolën dhe Hellasi merr më shumë “jetë”. Nga një inkursion i Grekos, i cili u frenua në zonë me faull nga Vidiç, lind edhe penalltia e humbur prej Tonit. Aty Verona e kuptoi se nuk ishte mbrëmja e saj, ndërsa Interi vazhdoi t’i përgjigjej me kundërsulme. Pas zbritjes së radhës, zikaltrit gjetën edhe golit e tretë: D’Ambrozio futi në zonë një kros që u kthye në gol nga Moras. Një ndeshje e luajtur me grintën e duhur, riktheu Interin te fitorja pas 7 takimesh

NDIQE LIVE "PANORAMA TV"

---