Yllit të skuadrës i skadon kontrata, Kukësi në “ajër” për rinovimin
Agim Ibraimi është nga të paktët futbollistë që u afrua me bujë te Kukësi në verën e vitit të kaluar dhe deri më tani mund të thuhet se ka bërë diferencën në kampionatin shqiptar. Edhe pse nuk është një qendërsulmues i mirëfilltë, 32-vjeçari ka bërë bomberin te verilindorët, duke shënuar 11 gola deri më tani.
Ai është kryegolashënues në Superiore dhe forma e tij e mirë bëri që kombëtarja e Maqedonisë së Veriut ta rikthente së fundmi. Prej disa ditësh fantazisti është i angazhuar me skuadrën përfaqësuese, teksa është aktivizuar pak minuta në ndeshjen eliminatore kundër Rumanisë, të cilën Maqedonia e Veriut e humbi 3-2.
Ai u fut në fushë në minutën e 88-të, ndërsa në takimin e së dielës në Shkup kundër Lihtenshtejnit, qëndroi në stol gjatë gjithë ndeshjes. Ky është sezoni i parë që Ibraimi luan në kampionatin shqiptar, por në mbyllje të tij, kontrata me Kukësin përfundon. Vetë lojtari, i pyetur pak ditë për më parë për të ardhmen, zbuloi: “Kontrata më skadon në fund të sezonit. Të them të vërtetën ende s’kam menduar për të ardhmen. Do të shohim në fund të kampionatit”.
Tashmë mbetet për t’u parë se cila do të jetë lëvizja konkrete e klubit verilindor për një prej lojtarëve më të mirë që ka aktualisht në përbërje. Burime në klub bëjnë të ditur se Ibraimi është në planet e drejtuesve edhe për sezonin e ardhshëm, për më tepër që Kukësi do të luajë në stadiumin e rindërtuar, “Zeqir Ymeri”.
Objektivat e klubit do të jenë pa dyshim fitimi i të dy trofeve. Aktualisht, pjesa dërrmuese e ekipit është nën kontratë edhe për sezonin e ri dhe Kukësi e një ka një bazë, por zhgënjimi i këtij sezoni në rezultate i bën të pashmangshme skarcimet. Një prej titullarëve që pritet të largohet është Vesel Limaj, i cili nuk ka pranuar të rinovojë marrëveshjen.
PANORAMASPORT.AL
NDIQE LIVE "PANORAMA TV"