Shkumbini po vijon përgatitjet për Laçit, takim të cilin do ta zhvillojë në transfertë. Për futbollistët bardhekaltër, kjo sfidë ka shumë rëndësi, pasi një fitore e mundshme i mban ata në garë për mbijetesën. Mbrojtësi Klement Xhyra, duke e vlerësuar skuadrën kurbinase si një ekip të fortë, premton se ekipi i Shkumbinit do të udhëtojë drejt Laçit për të zhvilluar një futboll dinjitoz dhe sigurisht për të kërkuar fitoren. “Po vijojmë rregullisht stërvitjen dhe sigurisht që morali i skuadrës është i lartë pas rezultateve pozitive që kemi arritur së fundmi. Ndoshta rivalëve tanë mund t’u duket se skuadra jonë i ka fituar pa shumë djersë këto pikë. Mirëpo, unë do t’u thosha atyre futbollistëve që aludojnë më kot, që ne kemi sakrifikuar shumë në fushën e lojës. Madje, disa javë më parë unë e kam lënë fushën e lojës i dëmtuar në kokë. Ne kemi humbur në fushën tonë dhe sërish nuk jemi ankuar, kurse kundërshtarët tanë direkt për mbijetesë fillojnë e bëjnë llogaritë se në cilën fushë do të fitojë Shkumbini”, – tha fillimisht mbrojtësi, i cili ka mbetur i indinjuar nga pohimet e futbollistëve të Besës. Ndërsa duke analizuar sfidën e radhës ndaj kurbinasve, ai shprehet optimist në lidhje me marrjen e një rezultati pozitiv. “Siç e thashë, për ne është një sfidë e rëndësishme ose më mirë një tjetër finale, e cila duhet kaluar me sukses. Ne premtojmë që do të japim më të mirën e mundshme të forcave tona, ndërsa mbijetesën e skuadrave le ta vendosë fusha e lojës, për atë skuadër që do të qëndrojë dhe ajo që do të bjerë një kategori më poshtë”, – përfundoi Xhyra.
Fatmir Ahmeti

NDIQE LIVE "PANORAMA TV"

---