VIDEO/ Polemika, VAR dhe 100 minuta për një barazim, ndeshje dramatike midis Dinamos e Laçit

Panorama Sport | Lajmet e fundit nga sporti

Postuar: Shtator 17, 2021 | 23:55

VIDEO/ Polemika, VAR dhe 100 minuta për një barazim, ndeshje dramatike midis Dinamos e Laçit

Dinamo dhe Laçi nuk kanë shkuar më shumë se barazimi 1-1 në ndeshjen e luajtur dje në “Elbasan Arena”. Ishin 90 minuta që i patën të gjitha brenda duke nisur nga autogoli i Juljan Shehut në portën e kurbinasve, te rastet e diskutueshme që kërkuan ndërhyrjen e VAR-it dhe mbyllja dramatike, ku mbrojtësi Marko Roganoviç me goditjen e tij të fuqishme nga jashtë zone vulosi barazimin në limit. 

bandicam 2021-09-17 21-37-38-924

Dinamo ishte më afër fitores, por në 15 minutat e fundit lëshoi terren dhe u ndëshkua atëherë kur nuk e priste. Bardhezinjtë e drejtuar nga Dejan Vukiçeviç ishin një tjetër ekip ndaj Dinamos, që nuk kishte lidhje me atë që humbi thellë në shtëpi në javën e parë me Vllazninë. Edhe pse pati një vendosmëri të Laçit për të marrë rezultat pozitiv duke e shoqëruar me agresivitet dhe raste të pastra në portën e Harizajt, sërish blutë e Bledi Shkëmbit i patën të gjitha mundësitë për ta realizuar golin e dytë. Megjithatë, në fund barazimi dukej rezultati më i drejtë.

PJESA E PARË

Shkëmbi i kishte besuar formacionit fitues ndaj Kastriotit, ndërsa Vukiçeviçi rikonfirmonte mbrojtjen pas goleadës dhe të vetmin ndryshim e kishte bërë në krahët e sulmit duke lënë në stol Mazrekajn dhe aktivizuar Ilirid Ademin. Laçi e nisi më mirë takimin dhe iu afruar golit me Dejan Zarubicën, por Harizaj shpëtoi Dinamon. Reagimi i bluve vjen me goditjet nga jashtë zone, teksa tenton dy herë kapiteni Ibraimi.

Kurbinasit janë më kërkues, por jo të qartë para portës, kjo edhe prej meritës së mbrojtjes blu, aty ku Sofranaku dhe Imami mbulojnë më së miri qendërsulmuesin e Laçit, Guindo. Një “predhë” e Demirit krijon iluzionin e golit për dinamovitët dhe minutat e fundit të pjesës së parë flasin për skuadrën blu, që insiston me të gjitha mënyrat për avantazhin. Mirëpo, edhe kur e dërgon topin në rrjetë me Sofranakun, goli anulohet për pozicionet jashtë loje. Përtej rasteve, skuadrat shkuan në dhomat e zhveshjes me rrjeta të paprekura.

Dinamo-Laci ndeshja

PJESA E DYTË

Pas pushimit, vetëm Dinamo bën ndryshime. Shkëmbi lë në dhomat e zhveshjes Sidibenë dhe Gavazajn, për të aktivizuar debutuesit me fanellën blu: Samake dhe Haxhiu. Fillimisht është Laçi që rrezikon me Zarubicën, por menjëherë pas këtij momenti, Dinamo gjen avantazhin.

Në zhvillimet e një aksioni nga krahu i majtë, maqedonasi Isaevski kroson në zonë dhe aty mesfushori i Laçit, Juljan Shehu, e devijon në rrjetë duke shkaktuar autogol. Reagimi i kurbinasve vjen me Ademin, që i vetëm me Harizajn nuk shënon dot duke shpërdoruar një mundësi të artë. Vukiçeviçi hedh në fushë “kartën”, Mazrekaj dhe fantazisti bëhet protagonist absolut në 30 minutat e fundit. Inkursionet e tij nga krahu i majtë janë gjithnjë të rrezikshme, aq sa Shkëmbi zëvendëson Silajnovskin dhe vendos Maliqin të mbulojë kosovarin.

Blutë mundohen të administrojnë avantazhin, por bien fizikisht në fund dhe pavarësisht zëvendësimeve, kjo ndihet dukshëm në fushë. Gjithsesi, deri në minutën e 90-të rezultati flet për Dinamon, por ekuilibrat prishen pas një goditjeje nga këndi. Mbrojtësi Roganoviç ndëshkon Harizajn pas një gjuajtje nga jashtë zone, por për të konfirmuar golin duhen tre minuta dhe kryesori Ferataj e certifikon pasi i bën një kontroll pamjeve filmike. Koha shtesë nuk sjell ndryshime në rezultat dhe gjithçka mbyllet me shifrat e barabarta, pikërisht kur kronometri po shkonte në minutën e 100-të prej vonesave të shumta.

FT| DINAMO-LAÇI 1-1

53′ Shehu (autogol)/ Roganoviç 90′

Komenti 

Mbyllet sfida!

94′ Pas 3 minutash te monitori i VAR-it, gjyqtari Ferataj akordon gol të rregullt për Laçin.

92′ Gjyqtari Ferataj i drejtohet monitorit të VAR-it pas dyshimeve për një pozicion jashtë loje tek goli i Roganoviç.  Kurbinasit në ankth.

90′ GOOOOOOL Laçi 1-1/ Kurbinasit barazojnë shifrat, Roganoviç realizon supergol nga distanca pas një skeme mjaft të bukur.  E djathta e malazezit, e pakapshme për Harizajn.

90′ Laçi provon gjithçka në fundin e ndeshjes, kurbinasit hidhen në sulm për golin e barazimit.

87′ Zëvendësim në radhët e Dinamos, largohet Agim Ibraimi, në fushë Kevin Berberi.

83′ Tre zëvendësime në radhët e Laçit: Prenga për Zarubicën, Zulfija për Ademin dhe Klinti Qato për Juljan Shehun.

80′ Situatë e tensionuar në fushë, futbollistë e Laçit kërkojnë faull pas një pretendimi për prekje të topit me dorë nga Eni Imami. Mazrekaj ndëshkohet me karton të verdhë për protesta.

77′ Bardhi tenton të bëhet menjëherë protagonist, por godet keq pas një pasimi të mirë të Demirit.

75′ Zëvendësim në radhët e Dinamos, largohet Siljanovski dhe i bën vend Edis Maliqit, ndërsa Patrik Bardhi zë vendin e Mihanës.

71′ Mazrekaj tenton të bëjë gjithçka vetë, driblon bukur Haxhiun por goditja është e lehtë dhe përfundon në duart e gardianit Harizaj.

69′ Rast i mirë për Laçin, Mazrekaj gjen bukur Shehun, mesfushori godet por pret Harizaj.

66′ Karton i verdhë për Siljanovski pas një faulli në dëm të Mazrekajt.

64′ Largohet Giundo, në fushë Mentor Mazrekaj për Laçin.

60′ Çinedu kombinon bukur në zonë me Rimal Haxhiun me këtë të fundit që pretendon për penallti pas një kontakti në zonë me Veliajn, por për gjyqtarin nuk është asgjë.

58′ Rast i artë për Laçin, Harizaj shpëton Dinamon. Guindo gabon gjithçka duke goditur keq me portën thuajse të boshatisur.

53′ GOOOOOL Dinamo 1-0/ Blutë kalojnë në avantazh me një autogol të shkaktuar nga Shehu pas krosimit të Isaevskit nga e majta.

52′ Karton i verdhë për Julian Shehun. Mesfushori i Laçit ndalon me faull për të disatën herë kapitenin e Dinamos agrim Ibraimi.

49′ Minutat e para të pjesës së dytë nisin mirë për Laçin, kurbinasit tentojnë të dalin në sulm me pasime të shumta në mesfushë.

46′ Pjesa e dytë nis me zëvendësime, lë fushën e lojës Gavazaj për Dinamon, në vend të tij Rimal Haxhiu.

Mbyllet pjesa e parë. Laçi e nisi vrullshëm, por me kalimin e minutave Dinamo mori kontrollin e lojës duke tentuar disa herë portën me kapitenin Ibraimi e Demirin. Vlen për tu theksuar goli i realizuar nga Shofranac i cili u anulua me VAR nga gjyqtari Ferataj pas një sinjalizimi në kufje. 

44′ Pasi konsultohet me VAR-in gjyqtari Ferataj anulon golin për pozicion jashtë loje. Momenti më i dyshimtë deri tani në Superiore.

42′ Shofranac kalon në avantazh Dinamos pas një harkimi të bukur nga e majta, por goli anulohet për pozicion jashtë loje. Moment i dyshimtë ku pritet të ndërhyjë VAR-i.

39′ Sërish e rrezikshme Dinamo, kësaj here provon kapiteni Ibraimi me një gjuajtje të bukur, por Sherri pret sërish.

37′ Alen Sherri bën heroin. Portieri i kurbinasve pret saktë një goditje të Demirit nga jashtë zone, duke e devijuar topin në goditje këndi.

34′ Mundësi e mirë për Dinamon, por Sidibe ndërhyn ashpër në dëm të kapitenit të kurbinasve Ignjatoviç dhe për gjyqtarin është faull.

31′ Përplasje e fortë në mesfushë midis Shehut dhe Çinedu, me këtë të fundit që mbetet shtrirë në mesfushë,  por gjyqtari lejon avantazhin e lojës.

29′ Skemë e rrezikshme nga ana e Laçit, kurbinasit tentojnë të gjejnë golin e avantazhit, por pa rezultat.

28′ Mundësi e mirë për kurbinasit, Zarubica fiton një faull afër zonës pas një dueli me Shofranac.

24′ Imami hap bukur topin në krah për Mihanën. me këtë të fundit që i vjedh kohën mbrojtësit Roganoviç dhe fiton faull.

23′ Ardit Deliu ndëshkohet me karton të verdhë pas një ndërhyrje të ashpër ndaj Enis Gavazajt.

21′ Kundërpërgjigjet Laçi. Deliu provon të godasë nga jashtë zone, por gjuajtja e tij përfundon ngjitur me shtyllën e portës të mbrojtur nga Edvan Bakaj.

20′ Zgjohet Dinamo. Skuadra e Shkëmbit kap në befasi mbrojtjen e Laçit, por Çinedu bën faull në sulm në dëm të Renato Malotës.

18′ Ibraimi ekzekuton goditjen e dënimit, por sfera përfundon ngjitur me shtyllën. Rast i mirë për të shënuar për Dinamon.

16′ Agim Ibraimi fiton një faull në një zonë të rrezikshme pas një kontakti me Julian Shehun në mesfushë.

15′ Guindo bën një ndërhyje të ashpër ndaj Eni Imamit duke e goditur me bëryl në fytyrë. Gjyqtari akordon karton të verdhë për sulmuesin e kurbinasve.

14′ Blutë tentojnë të dalin para me Gavazajn, por krosimi i tij pastrohet nga zona e Laçit.

10′ Dinamo pa ide në 10 mintuat e para. Skuadra e Shkëmbit e ka të vështirë të dalë përpara. Laçi e ka mbyllur në gjysmëfushën e saj.

8′ Shehi provon të godasë, por topi devijohet dhe përfundon në goditje nga këndi për Laçin.

4′ Rast i artë për Laçin, Ademi harkon bukur në zonë, Zarubica godet keq duke humbur shansin për të kaluar në avantazh kurbinasit.

3′ Guindo provon të bëhet i rrezikshëm në zonë, por e mbyll bukur Eni Imami.

1′ Starton sfida. Laçi shkelmon topin e parë nga mesi i fushës.

Para startit të sfidës mbahet 1 minutë heshtje në nder të fizioterapistit të Kombëtares, Ylli Mihali që humbi jetën pak ditë më parë si pasojë e koronavirusit. 

FORMACIONET ZYRTARE

Dinamo: Harizaj, Siljanovski, Sofranak, Imami, Isaevski, Demiri, Sidibe, Mihana, Gavazaj, Ibraimi, Çinedu
Trajner: Bledi Shkëmbi

Laçi: Sherri, Roganoviç, Malota, Ignjatoviç, Velija, Deliu, Shehu, Lushkja, Sulovari, Guindo, Zarubica
Trajner: Dejan Vukiçeviç

Gjyqtar kryesorë: Olsid Ferataj

Dinamo Laci Protokolli

STATISTIKA DINAMO-LAÇI

Ndeshjet e fundit: 14

6 Fitore Dinamo: 6 Barazime: 4 Fitore Laçi

Golavarazhi: 27-16

Fitorja e fundit e Dinamos: 3 tetor 2009, 0-1

Barazimi i fundit: 1 prill 2012, 2-2

Fitorja e fundit e Laçit: 23 tetor 2011, 1-0

Vlera në total e ekipit: 4.5 milionë € – 3.95 milionë €

Lojtari më i shtrenjtë: Agim Ibraimi (300 mijë €)- Regi Lushkja (350 mijë €)

Mosha mesatare e ekipit :24.6 vjeç – 24.5 vjeç

Lojtari më i vjetër: Edvan Bakaj (33) – Aleksandar Ignjatoviç (33)

Lojtari më i ri: Simon Simoni (17) – Arbër Bytyqi (17)

Titujt kampion: 18-0

Kupat e Shqipërisë:  13-2

PANORAMASPORT.AL

NDIQE LIVE "PANORAMA TV"