Laçi dhe Partizani e mbyllën në një barazim pa gola, sfidën mes tyre për ndeshjen e javës së katërt në Kategorinë Superiore. Ishin vendasit ata që kishin rastet më të pastra për këtë takim, por dy herë ndaj Xhixhës, dhe një herë ndaj Fangajt, portieri i “demave”, Alban Hoxha, mbajti të paprekur rrjetën.

Edhe ekipi i Skënder Gegës pati rastet e veta, kryesisht me goditjet standarte dhe ato nga jashtë zone, por edhe Selmani nga ana tjetër u paraqit në lartësinë e detyrës. Në fund, nga një pikë për të dyja ekipet, me Laçin që vazhdon të mbetet i pamposhtur në këtë kampionat.

 

Laçi-Partizani 0-0

 

KOMENTI

Mbyllet sfida. Laçi-Partizani 0-0

90′ 3 minuta shtesë.

86’ Smaçi në vendin e Xhixhës, Mërgjyshi kryen edhe zëvendësimin e fundit.

84’ Top i gjatë për Bardhin në një aksion të rrezikshëm, por arbitrin akordon faull për prekje të topit me dorë nga ana e sulmuesit të kuq.

79’ Gega kryen edhe ndërrimin e dytë. Asani i lë vendin Hilës.

78’ Fangaj lëviz mirë në hyrje të zonës së Partizanit, në fund jep një top në hyrje të 16-shes, por Telushi kupton gjithçka, kthen topin te Hoxha e ky i fundit largon me këmbë.

76’ Zëvendësimi i dytë te kurbinasit. Sukaj rikthehet tashmë si “ish” ndaj Partizanit, në vendin e Shtubinës.

75’ Karton i verdhë për Ibrahimin, që pengon Shtubinën.

73’ Pasim i bukur për Çinarin, por Fangaj mbyll një aksion që shkonte rrezikshëm drejt portës së Selmanit.

68’ Gega kryen lëvizjen e parë. Një shkodran për një tjetër. Del Hebaj, futet Çinari.

66’ Aksion i rrezikshëm i Laçit, krosohet nga e djathta, por topi mbetet në hyrje të zonës, ku godet Jonuzi, por portieri Hoxha sërish në lartësinë e duhur.

65’ Zëvendësimi i parë te kurbinasit. Altinparmakovski i lë vendin Jonuzit.

62’ Karton i verdhë për Regi Lushkjen, pas një ndërhyrje me taka ndaj Bardhit.

61’ Ndëshkohet me të verdhë edhe Bardhi tek demat.

59’ Karton i verdhë për mesfushorin e Laçit, Nikola Eler, për një tension me Telushin.

58’ Krosim nga këndorja për Atandën, godet me kokë por shumë mbi kuadrat.

57’ Hebaj kalon me forcë dy kundërshtarë në zonën e Laçit, por në fund pasimi për Bardhin largohet nga kurbinasit në goditje këndi.

54’ Provon Lushkja nga distanca, por pa saktësinë e duhur goditja.

51’ Përplasje e fortë për Kalarin në një dyluftim ajror me Fangajn, por mbrojtësi i kuq përfundon jashtë vijave anësore gjatë rënies, dhe merr menjëherë mjekimin e stafit.

46’ Nis pjesa e dytë. Trajnerët me të njëjtët lojtarë në fushë që e mbyllën të parën.

Mbyllet pjesa e parë. Laçi-Partizani 0-0

46’ Xhixha provon sërish, pothuajse nga i njëjti pozicion si pak më parë, por Hoxha sërish grushton.

45’ 1 minutë shtesë.

45’ Provon sërish Partizani, tani me Hebajn, por Selmani dërgon topin në këndore.

44’ Mundësi e shkëlqyer nga Atanda pas një goditje këndi, por mbrojtësi godet jashtë porte.

39’ Lushkja kroson një top në zonën e Partizanit, dhe Hoxha nuk merret vesh mirë me mbrojtjen, dhe largon paksa rrezikshëm.

38’ Tjetër tentativë e Telushit, godet nga shumë jashtë zone fuqishëm, dhe Selmani grushton fillimisht, e më pas kontrollon topin.

37’ Kroson Trashi nga e majta e sulmit, por topi është shumë i fortë për Asanin i cili gjendet në shtyllën e dytë.

35’ Goditje dënimi për Partizanin, Telushi provon me një të djathtë të fortë, por topi devijohet për në këndore.

32’ Ndërhyrje e Telushit në mesfushë ndaj Shtubinës, arbitri e paralajmëron.

24’ Goditje këndi për Laçin, topi shkon tek Mersini, por me kokë ky i fundit nuk ka shënjestrën e duhur.

20’ I ndëshkuari i parë me karton të verdhë, Sodik Atanda, për një faull ndaj Xhixhës.

19’ Goditje e fortë e Xhixhës nga jashtë zone, por Alban Hoxha nuk kapet në befasi dhe grushton në mënyrë spektakolare.

12’ Asani jep një krosim brenda zone, por Mersinaj largon me kokë.

5’ Esat Mala rrëzohet brenda zonës së Laçit, por për arbitrin nuk ka asgjë.

3’ Krosim drejt zonës nga një goditje e lirë e Sefgjinit, por topi largohet me kokë.

2’ Pasim i gabuar i Selmanit, ku përfiton Bardhi, por aksioni i të kuqve humbet befasinë, dhe më pas e dorëzojnë topin te kurbinasit.

1′ Nis takimi në Laç.

 

FORMACIONET

Laçi: Selmani; Fangaj, Mersini, Gjoni, Sefgjini, Eler, Shtubina, Lushkja, Najdenov, Altinparmakovski; Xhixha. Trajner: Artan Mërgjyshi

Partizani: Hoxha; Ibrahimi, Belica, Atanda, Kalari; Telushi, Mala, Trashi; Asani, Bardhi, Hebaj. Trajner: Skënder Gega.

NDIQE LIVE "PANORAMA TV"

---