Vllaznia e ka nisur në mënyrën më të mirë të mundshme vitin 2020-të, duke mposhtur Flamurtarin me rezultatin 2-0 në takimin e vlefshëm për javën e 18-të të Kategorisë Superiore.

Ishte kapiteni Gilman Lika, ai i cili në minutën e 38-të, gjeti rrugën e rrjetës nga pika e bardhë e penalltisë, duke dërguar skuadrën e tij në dhomat e zhveshjes me avantazhin e 1 goli.

Për të hipotekuar këtë sukses, mendoi mesfushori brazilian Hygor, i cili me një roveshatë spektakolare, brenda zonës, pas krosimit nga e djathta, dyfishoi shifrat, duke vulosur përfundimisht këtë sfidë. Një gol “alla Kristiano Ronaldo”.

 

Me këtë triumf, shkodranët ngjitën në kuotën e 26 pikëve, ndërkohë që Flamurtari vazhdon të mos njohë ende shijen e fitores në këto 18 javë. Situata te vlonjatët duket tepër kaotike.

FT: VLLAZNIA – FLAMURTARI 2-0

Lika 38, Hygor 82′ 

KOMENTI LIVE:

Mbyllet sfida! 

90+1′ Pranë golit të tretë Vllaznia, me Gilman Likën, por ndërhyn portieri Moçka, duke larguar rrezikun në këndore!

90′ Akordohen 3 minuta shtesë!

89′ Flamurtari kryen zëvendësimin e tretë, largohet Muçollari, vendin e tij e zë Balilaj!

86′ Zëvendësim i dytë te Flamurtari, largohet Haruni, vendin e tij e zë Elmazaj!

82′ GOOOL VLLAZNIA 2-0/ Super super gol! Çmendet braziliani Hygor, i cili pas një harkimi të bukur nga e djathta, gjuan me roveshatë duke e dërguar topin në trekëndës. Një gol spektakolar! 

81′ Provon Mevlan Adili nga jashtë zonës, topi shkon jashtë kuadratit.

78′ Bie ndjeshëm rritmi i lojës. Vllaznia qarkullon topin dhe mundohet të menaxhojë avantazhin. Në krahun tjetër vlonjatët provojnë të nisin disa sulme, por pa rrezikuar ndjeshëm portën e Sherrit.

72′ Malota ndëshkohet me karton të verdhë për vonesë të lojës.

70′ Trajneri Jonuz nuk pret, kryen zëvendësimin e tretë, largohet nga fusha sulmuesi Hristov, vendin e tij e zë Silvio Zogaj.

69′ Zëvendësim te Flamurtari, largohet nga fusha Arinaldo Rrapaj, vendin e tij e zë i riu Llapi.

65′ Zëvendësim i dytë te Vllaznia, largohet Ramadani, vendin e tij e zë Mevlan Adili, mbrojtësi që u afrua në merkaton e janarit!

62′ Denis Pjeshka ndëshkohet me karton të verdhë për ndërhyrje të gabuar në mesfushë.

59′ Zëvendësimi i parë te Vllaznia, largohet nga fusha, Bardulla, vendin e tij e zë braziliani Hygor.

56′ Provon të surprizojë Vllaznia me Harunin, por harkimi i futbollistit vlonjat përfundon në duart e portierit Sherri.

50′ Hristov provon të avancojë drejt zonës së Flamurtarit, por nuk koordinohet siç duhet në momentet e fundit, duke sfumuar një mundësi shënimi!

46′ Starton pjesa e dytë!

Mbyllet pjesa e parë! 

45+1′ Akordohet një minutë shtesë

40′ Pranë golit të barazimit Flamurtari me Denis Pjeshkën, gjuajtja brenda zonës e mbrojtësit ndalet nga portieri Sherri.

38′ GOOOOL VLLAZNIA 1-0/ Kapiteni Gilman Lika realizon nga pika e bardhë e penalltisë, duke mposhtur portierin Moçka. 

36′ 11-metërsh për skuadrën e Vllaznisë. Malota rrëzohet brenda zonës pas një ndërhyrje të Muçollarit, për gjyqtarin nuk ka dyshime, penallti për shkodranët!

31′ Muçollari harkon në zonë, por mbrojtësit shkodranë të vëmendshëm largojnë rrezikun.

20′ Kapiteni Gilman Lika provon të surprizojë me një gjuajtje gjysëm roveshatë, por pa problem për portierin Moçka.

19′ Pranë goli Vllaznia me Renato Malotën. Pas një goditje dënimi nga e majta, kroson Lika, mbrojtësi Malota ngrihet bukur me kokë, por mbi gjuajtja e tij shkon mbi traun e portës.

15′ Tjetër goditje këndi e fituar nga Flamurtari, pas topi të devijuar nga Malota. Kroson Rrapaj, por pa rrezik. 

14′ Goditje dënimi për Vllazninë, harkon Lika rrezikshëm drejt zonës, por largojnë mbrojtësit e Flamurtarit në momentin e fundit!

10′ Provon Flamurtari me Ribajn, i cili gjuan nga goditja e dënimit, por topi devijohet dhe shkon në këndore.

5′ Më kërkues vendasit në këto minuta të para, që provojnë të avancojnë në zonën e vlonjatëve, por pa sukses deri në këto minuta.

2′ Shkodranët e nisin menjëherë në sulm dhe provojnë me Shtubinën, gjuajtja e futbollistit në hyrje të zonës, ndalet nga mbrojtësit e Flamurtarit.

1′ Ka nisur sfida!

Formacionet zyrtare:

Vllaznisa: Sherri, Gligorov, Shehi, Malota, Marku, Gurishta, Ramadani, Bardulla, Lika, Shtubina, Hristov. Trajner: Mirsad Jonuz.

Flamurtari: Moçka, Gocaj, Pjeshka, Muçollari, Haruni,  Rrapaj, Vrapi, Nebihu, Kreshpa , Hoxhaj, Ribaj. Trajner: Dritan Resuli.

PANORAMASPORT.AL

NDIQE LIVE "PANORAMA TV"

---