VIDEO/ Gjermania larg forme, fiton me vuajtje testin kundër Perusë
Nëse barazimi 0-0 kundër Francës të enjten ishte një hap përpara, fatkeqësisht ky ishte një tjetër hap pas”. E përshkruan me nota kritike provën e dytë të Gjermanisë pas Botërorit kundër Perusë “Bild” në Gjermani, ndonëse “Pancerat” arritën të triumfojnë 2-1 në shtëpinë e Hofenhaimit.
Vendimtar goli i debutuesit Niko Shulc në minutën e 85-të, i cili solli fitoren e parë të ish-kampionëve të botës në “RheinNeckar-Arena” pas zhgënjimit në Rusi. Goditja e mbrojtësit të Hofenhaimit u ndihmua për të përfunduar në rrjetë edhe nga një gabim i portierit peruan, Pedro Galeze.
25-vjeçari shleu në këtë mënyrë përgjegjësinë e tij te goli i parë i miqve, pasi dështoi të ndalte Luis Advinkulën të shpërthente në krahun e majtë të Gjermanisë, në një kundërsulm përpara se të mposhte Ter Shtegenin nga një kënd i ngushtë. Por, Gjermania reagoi shpejt dhe tri minuta pas golit të Advinkulës, Julian Brand iu përgjigj me një parabolë që nuk i la asnjë shans portierit pas asistit fantastik të Krosit.
Gjermania e nisi shkëlqyeshëm kur Marko Rojs u ndal brenda dy minutave nga Galeze, i cili më pas u ngrit për të shmangur edhe goditjen e Ginterit me kokë. Kjo deri në minutën e 22-të kur Peruja goditi me kundërsulm. Advinkulës iu lejua shumë hapësirë dhe as Shulc, por as Zyle dhe portieri Ter Shtegen nuk arritën të ndalnin goditjen e mbrojtësit në shtyllën e parë. Të dyja skuadrat krijuan shanse pafund në pjesën e dytë:
Timo Verner shpërdoroi rastin më të mirë për Gjermaninë pas një pune të mrekullueshme të Julian Brandit, ndërsa peruanët e patën rastin më të mirë për të shënuar me Xheferson Farfanin, por edhe ai gaboi shënjestër. Kur dukej se gjithçka do të përfundonte me një barazim, vjen gabimi i papritur i Galezes që nuk ndal si duhet të majtën e dobët të Shulcit, e cila i kalon poshtë duarve. Fitore për të larguar disi presionin, por jo problemet e kësaj Gjermanie. ‘
Përgatiti: ANDROKLI DRALO
NDIQE LIVE "PANORAMA TV"