VIDEO/ Erzeni mposht Valbonën, vendos një supergol në fund
Një gol në minutat e fundit nga i riu shijakas, Isteri, vendosi për fitoren e Erzenit ndaj Valbonës.
Ndeshja miqësore mes dy ekipeve u zhvillua dje në kompleksin “Internacional” në Pezë-Helmes, teksa iu dha mundësinë trajnerëve të shikojnë gjendjen e lojtarëve gjatë kësaj periudhe pushimi të kampionateve.
Loja do të niste e vrullshme për shijakasit, që ishin më të favorizuar në letër për ta fituar këtë përballje. Erzeni gjeti rrugën e rrjetës me anë të Peposhit në minutën e 6-të.
Mbrojtësi i majtë finalizoi me një goditje mjaft të bukur pas krosimit të ardhur nga Ademi.
Më pas do të kapej mesi i fushës po nga shijakasit, të cilët vertikalizonin me anë të Kahrimanoviçit, por portieri i Valbonës nuk ndëshkohet sërish.
Kombinimet e bukura ndërmjet Alan dhe Kadriut, krijuan rrezikshmëri të madhe në zonën e skuadrës tropojane, që militon në Kategorinë e Dytë.
Megjithatë, pavarësisht përpjekjeve të shijakasve për të shënuar golin e dytë, pjesa e parë u mbyll 1-0.
Në pjesën e dytë trajnerët Kapllani dhe Kërnaja hodhën lojtarë nga stoli, të cilët bënë paraqitjen e tyre dinjitoze.
Shijakasit do të kapeshin në befasi nga goli i sulmuesit Ardit Jaupaj, që u evidentua nga radhët e tropojanëve.
Loja u ekuilibrua, por shijakasit kërkuan fitoren deri në fund dhe ndeshjen do ta zgjidhte i riu Isteri, i cili shënoi një supergol pas goditjes nga jashtë zone me të djathtë, duke vulosur rezultatin 2-1.
Isteri është një nga lojtarët më premtues që vjen nga ekipet zinxhir.
-GOLI I VALBONËS ME JAUPAJN
RONALD FAJA – PANORAMASPORT.AL
NDIQE LIVE "PANORAMA TV"