VIDEO / Atalanta zgjohet në fund, por Milani është përsëri i frikshëm

Panorama Sport | Lajmet e fundit nga sporti

Postuar: Tetor 3, 2021 | 22:44


VIDEO / Atalanta zgjohet në fund, por Milani është përsëri i frikshëm

Milani ka konfirmuar pretendimet që ka në këtë sezon duke marrë një fitore të rëndë 3-2 në fushën e Atalantës. Skuadra kuqezi ka dominuar sfidën thuajse plotësisht dhe vetëm zgjimi në fundin e duelit nga zikaltërit bëri që diferenca të ishte më e ngushtë.

atalanta milan

Kuqezinjtë e nisën ndeshjen me një gol të shpejtë, me Kalabria i cili dërgoi sferën në rrjetë pa kaluar 30 sekonda nga starti i sfidës. Kuqezinjtë iu afruan edhe golit të dytë, por Muso ishte vendimtar me devijimet e tij. Nga ana tjetër, Malinovski dhe Zapata rrezikuan portën e Menja, por ky i fundit ishte i pakalueshëm sot me dy pritje të shkëlqyera.

Në momentin kur Atalanta po rriste lojën e vet, erdhi dushi i ftohtë nga goli i Tonali, i cili vodhi topin nga Frojler dhe nuk e kishte të vështirë të çonte sferën në rrjetën e zikaltërve. Kjo goditje ishte e rëndë për Atalantën, e cila i lëshoi manovrën e lojës kuqezinjve të cilët krijuan raste të njëpasnjëshme derisa gjetën golin e 3-0 me Leaon.

Ndeshja dukej e mbyllur, por u hap në mënyrë të papritur me një penallti të realizuar nga Zapata dhe më pas në shtesë me golin e Pashaliç për vendasit. Por zgjimi ishte shumë i vonuar dhe Milani iu gëzua tre pikëve që e bëjnë përsëri ndjekësen e parë të Napolit në renditjen e Serisë A.

Atalanta-Milan 2-3
86′ (p) Zapata, 90’+4′ Pashaliç / 1′ Kalabria, 43′ Tonali, 78′ Leao



ATALANTA: Muso, Gjishmiti, Demiral, Palomino, Zapakosta, Frojler, De Ron, Maele, Pesina, Malinovski, Zapata, Trajner: Xh.Gasperini

MILAN: Menja, Kalabria, Kjaer, Tomori, Hernandez, Kesi, Tonai, Diaz, Salemakers, Leao, Rebiç, Trajner: S.Pioli

fam

seria a

PANORAMASPORT.AL