Vdekja e ish-boksierit Skënder Kurti, reagon presidenti Meta: Lamtumirë kampion!
Ish-boksieri dhe trajneri Skënder Kurti nuk ia doli që ta fitonte betejën me virusin e mallkuar Covid-19 dhe sot u nda nga jeta. Një ditë e zezë kjo për sportin shqiptar, që humbi një kampion dhe një njeri shumë të dashur për të gjithë.
Lidhur me këtë lajm të tragjik ka reaguar edhe Presidenti Ilir Meta, i cili me anë të një postimi ka shprehur hidhërimin e tij.
Ja postimi i plotë i kreut të shtetit:
“Me hidhërim të thellë mësova lajmin tragjik të ndarjes nga jeta të boksierit dhe trajnerit të shquar të Ekipit Kombëtar, njërit prej ikonave të sportit kryeqytetas, Skënder Kurti!
I admiruar nga të gjithë brezat e sportdashësve për rezultatet e tij në ring dhe pasionin e jashtëzakonshëm për sportin e dorezave, Ner Kurti gëzonte respektin e të gjithëve, veçanërisht të tironasve të mrekullueshëm që aq shumë e donin dhe i donte!
Edhe në këto ditë të vështira i madhi Ner Kurti luftoi fort, si një kampion që nuk dorëzohet lehtë!
I shpreh ngushëllimet më të sinqerta familjes Kurti, të afërmve, bashkëpunëtorëve e miqve të shumtë, në veçanti qytetarëve të Tiranës e tifozave të ngjyrave bardhë e blu për këtë humbje të pazëvendësueshme!
LAMTUMIRË KAMPION! “, shkruan Presidenti Meta në rrjetin social.
PANORAMASPORT.AL
NDIQE LIVE "PANORAMA TV"